സി.ഐ.സി തര്‍ക്കം പരിഹരിക്കാനായി ചര്‍ച്ച നടത്തി നേതാക്കള്‍

കോഴിക്കോട്: സി.ഐ.സി വിഷയം പരിഹരിക്കാനായി ചര്‍ച്ച നടത്തി ലീഗ്-സമസ്ത നേതാക്കള്‍. സമസ്ത-സി.ഐ.സി തര്‍ക്കം രൂക്ഷമായ സാഹചര്യത്തിലാണ് നേതാക്കളുടെ ചര്‍ച്ച.

മുസ്‌ലിം ലീഗ് പ്രസിഡന്റ് സാദിഖലി ശിഹാബ് തങ്ങള്‍, പി.കെ. കുഞ്ഞാലിക്കുട്ടി, ആബിദ് ഹുസൈന്‍ തങ്ങള്‍, എം.സി. മായിന്‍ തങ്ങള്‍ എന്നിവരാണ് മുസ്‌ലിം ലീഗിന്റെ ഭാഗത്ത് നിന്നും ചര്‍ച്ചയില്‍ പങ്കെടുത്തത്.

സമസ്ത പ്രസിഡന്റ് ജിഫ്രി മുത്തുകോയ തങ്ങള്‍, ജനറല്‍ സെക്രട്ടറി ആലിക്കുട്ടി മുസ്‌ലിയാര്‍, കൊയ്യോട് ഉമര്‍, എം.ടി അബ്ദുള്ള മുസ്‌ലിയാര്‍ തുടങ്ങിയവര്‍ സമസ്തയുടെ ഭാഗത്ത് നിന്നും പങ്കെടുത്തു.

പ്രശ്‌നം പരിഹരിക്കാനായി ചില ഫോര്‍മുലകള്‍ തയ്യാറാക്കിയതായാണ് പുറത്ത് വരുന്ന റിപ്പോര്‍ട്ട്. അടുത്ത ദിവസം നേതാക്കള്‍ വീണ്ടും ചര്‍ച്ച നടത്തുമെന്നും തര്‍ക്കം പരിഹരിക്കുന്നതിന് ആവശ്യമായ നടപടികള്‍ എടുക്കുമെന്നുമാണ് സൂചന.

സമസ്തയിലെയും സി.ഐ.സിലെയും നേതാക്കള്‍ തമ്മില്‍ വാക്‌പോരും സാമൂഹിക മാധ്യമങ്ങളിലെ തര്‍ക്കവും തുടരുന്ന സാഹചര്യത്തിലാണ് നേതാക്കള്‍ ചര്‍ച്ച നടത്തിയത്. സി.ഐ.സി വിഷയവുമായി ബന്ധപ്പെട്ട സമസ്ത നേതാക്കള്‍ നേരത്തെ ചര്‍ച്ച നടത്തിയിരുന്നു.

അതേസമയം, സി.ഐ.സിയുടെ വിഷയത്തില്‍ ചേര്‍ന്ന യോഗത്തിന്റെ ഫോട്ടോ സാദിഖലി ശിഹാബ് തങ്ങള്‍ ഫേസ്ബുക്കില്‍ പങ്കുവെച്ചു. നല്ലൊരു സായാഹ്നം, എല്ലാ നന്മയിലേക്കാവട്ടെയെന്ന ക്യാപ്ഷനോട് കൂടിയാണ് ഫോട്ടോ പങ്കുവെച്ചിരിക്കുന്നത്.

Contenthighlight: the leadrs held discussion to resold cic-samastha problem