വിദ്വേഷവും കുപ്രചരണങ്ങളും കുത്തിനിറച്ച് 'ദി കേരളാ സ്റ്റോറി' ട്രെയ്‌ലര്‍ പുറത്ത്
എന്റര്‍ടെയിന്‍മെന്റ് ഡെസ്‌ക്
Wednesday, 26th April 2023, 11:40 am
കേരളത്തിനെതിരെ വിദ്വേഷ പ്രചരണം നടത്തിയെന്ന ആരോപണത്തിന് വിധേയമായ ദി കേരള സ്‌റ്റോറിയെന്ന ഹിന്ദി സിനിമയുടെ ട്രെയ്‌ലര്‍ പുറത്ത് വിട്ടു. ചിത്രത്തിന്റെ ആദ്യ ടീസര്‍ പുറത്ത് വന്നപ്പോള്‍ തന്നെ വലിയ രീതിയിലുള്ള വിവാദങ്ങള്‍ ഉയര്‍ന്നുവന്നിരുന്നു. വാസ്തവ വിരുദ്ധമായ ഉള്ളടക്കമാണ് ടീസറിലുള്ളതെന്നായിരുന്നു പ്രധാന വിമര്‍ശനം.
ഇപ്പോള്‍ പുറത്തിറക്കിയിരിക്കുന്ന ട്രെയ്‌ലറും അത്തരത്തില്‍ വാസ്തവ വിരുദ്ധമായ ഉള്ളടക്കങ്ങള്‍ അടങ്ങിയിട്ടുള്ളതാണ്. ഇസ്‌ലാമോഫോബിക്കായിട്ടുള്ള തീവ്ര വലതുപക്ഷ നിലപാടാണ് സിനിമ മുന്നോട്ട് വെക്കുന്നത്. കേരളത്തില്‍നിന്ന് 32,000 സ്ത്രീകളെ നിര്‍ബന്ധപൂര്‍വം മതംമാറ്റി ഐ.എസില്‍ ചേര്‍ക്കാന്‍ സിറിയയിലേക്കും യമനിലേക്കും അയച്ചെന്ന ആരോപണമാണ് കേരളാ സ്റ്റോറിയുടെ ടീസര്‍ മുന്നോട്ട് വെച്ചത്.
