ബാഗ്ദാദ്: ശൈശവ വിവാഹത്തെ പ്രോത്സാഹിപ്പിക്കുന്ന വിവാഹ നിയമത്തിന് അംഗീകാരം നല്‍കി ഇറാഖ് പാര്‍ലമെന്റ്. പെണ്‍കുട്ടികളുടെ വിവാഹപ്രായം ഒമ്പത് ആക്കി കുറയ്ക്കുന്ന വിവാദ ഭേദഗതിക്കാണ് ഇറാഖി പാര്‍ലമെന്റ് അംഗീകാരം നല്‍കിയത്.

നിയമഭേദഗതിക്കെതിരെ മനുഷ്യാവാകാശ സംഘടകനകളില്‍ നിന്നടക്കം എതിര്‍പ്പ് ഉയര്‍ന്നെങ്കിലും വോട്ടെടുപ്പ് പോലും നടത്താതെ പാര്‍ലമെന്റ് നിയമം പാസാക്കുകയായിരുന്നു.

ഇതിന് പുറമെ കുടുംബകാര്യങ്ങളിലും വിവാഹം, വിവാഹ മോചനം, അനന്തരാവകാശം തുടങ്ങിയ വിഷയങ്ങളിലും ഇസ്‌ലാമിക കോടതിക്ക് കൂടുതല്‍ അധികാരവും പുതിയ നിയമ ഭേദഗതി നല്‍കുന്നുണ്ട്.

പെണ്‍കുട്ടികളെ സദാചാരപരമായ ബന്ധങ്ങളില്‍ നിന്ന് സംരക്ഷിക്കാനാണ് ഷിയാ പാര്‍ട്ടികളുടെ നേതൃത്വത്തിലുള്ള യാഥാസ്ഥിതിക സര്‍ക്കാര്‍ ഇത്തരത്തിലൊരു തീരുമാനമെടുത്തതിന് കാരണമായി ചൂണ്ടിക്കാണിക്കുന്നത്. ഈ നിയമത്തിലെ രണ്ടാമത്തെ ഭേദഗതി സെപ്റ്റംബര്‍ 16ന് പാസാക്കിയിരുന്നു.

‘ലോ 188’ എന്ന് പേരിട്ടിരിക്കുന്ന പുതിയ നിയമം ആദ്യമായി 1959ല്‍ അവതരിപ്പിച്ചപ്പോള്‍ പശ്ചിമേഷ്യയിലെ ഏറ്റവും പുരോഗമനപരമായ നിയമങ്ങളിലൊന്നായിരുന്നു ഇതെന്ന് സര്‍ക്കാര്‍ അവകാശപ്പെട്ടിരുന്നു. നിലവില്‍ 18 വയസാണ് ഇറാഖിലെ വിവാഹ പ്രായം. വിവാഹ കരാര്‍ അവസാനിപ്പിക്കുമ്പോള്‍ മുസ്‌ലിം ദമ്പതികള്‍ സുന്നി വിഭാഗമോ ഷിയ വിഭാഗമോ തിരഞ്ഞെടുക്കണമെന്നും പുതിയ നിയമത്തില്‍ പറയുന്നുണ്ട്. ഇറാഖിലെ ജാഫറി സ്‌കൂള്‍ ഓഫ് ഇസ്‌ലാമിക നിയമം അനുസരിക്കുന്ന ഷിയ വിഭാഗത്തിന് വിവാഹ പ്രായത്തിന് പെണ്‍കുട്ടിയുടെ പ്രായം ഒമ്പത്‌ വയസാണ്.

പുതിയ നിയമ ഭേദഗതി ഇസ്‌ലാമിക് ശരീഅത്ത് നിയമത്തിന്റെ കര്‍ശനമായ വ്യാഖ്യാനമാണെന്നും പെണ്‍കുട്ടികളുടെ സംരക്ഷണമാണ് പുതിയ ഭേദഗതി ലക്ഷ്യമിടുന്നുതെന്നും സഖ്യ സര്‍ക്കാര്‍ പറഞ്ഞിരുന്നു. ഭേദഗതിക്കെതിരെ ഇറാഖി വനിതാ ഗ്രൂപ്പുകള്‍ എതിര്‍പ്പ് അറിയിച്ചിരുന്നു.

പെണ്‍കുട്ടിയുടെ പിതാവിന്റെ സമ്മതത്തോടെയാണ് വിവാഹം നടത്തുന്നതെങ്കില്‍, മതനേതാക്കന്മാര്‍ക്ക് ശൈശവ വിവാഹം നടത്തുന്നതിന് രാജ്യത്തെ നിയമത്തില്‍ നിലവില്‍ അവസരങ്ങളുണ്ട്. ഈ സാഹചര്യത്തിലാണ് ഒമ്പത് വയസുള്ള പെണ്‍കുട്ടികളെപ്പോലും ശൈശവ വിവാഹത്തിലേക്കു നയിക്കുന്ന പുതിയ നിയമം നടപ്പിലാക്കുന്നത്.

യൂണിസെഫിന്റെ റിപ്പോര്‍ട്ടുകളനുസരിച്ച് ഉയര്‍ന്ന ശൈശവവിവാഹ നിരക്കുള്ള രാജ്യമാണ് ഇറാഖ്. ഏകദേശം 28% ഇറാഖി പെണ്‍കുട്ടികള്‍ 18 വയസിനുള്ളില്‍ വിവാഹിതരാകുന്നു. പുതിയ ഭേദഗതി സ്ഥിതികള്‍ കൂടുതല്‍ വഷളാക്കുമെന്നാണ് സൂചന. സ്ത്രീകള്‍ക്ക് സംരക്ഷണം നല്‍കുന്ന 1959 കുടുംബ നിയമത്തെ അട്ടിമറിക്കുന്നതാണ് പുതിയ നിയമം.

Content Highlight: The Iraq parliament has passed the law which lower the marriage age of girls to nine without  vote