കുന്നംകുളം: ബൈബിള്‍ സിനിമയാക്കിയത് “ഡാവിഞ്ചികോഡ്” എന്ന പേരിലാണെന്ന വിചിത്രമായ കണ്ടെത്തലുമായി ഹിന്ദു ഐക്യവേദി സംസ്ഥാന അധ്യക്ഷ കെ.പി ശശികല. ഈ കാരണം കൊണ്ട് എം.ടി-മോഹന്‍ലാല്‍ കൂട്ടുകെട്ടില്‍ പുറത്തിറങ്ങാനിരിക്കുന്ന ചിത്രത്തിന് മഹാഭാരതം എന്ന പേരിടാന്‍ അനുവദിക്കില്ലെന്നും അവര്‍ കുന്നംകുളത്ത് പറഞ്ഞു. രണ്ടാമൂഴം എന്ന നോവലിന്റെ ചലച്ചിത്രാവിഷ്‌കാരമാണ് മഹാഭാരതം. ഹിന്ദു അവകാശ സംരക്ഷണ ജാഥയ്ക്ക് നല്‍കിയ സ്വീകരണ യോഗത്തില്‍ സംസാരിക്കുകയായിരുന്നു ശശികല.
ഡാന്‍ ബ്രൗണ്‍ രചിച്ച പ്രശസ്ത നോവലായ “ഡാവിഞ്ചികോഡി”ന്റെ ദൃശ്യാവിഷ്‌കാരമാണ് “ഡാവിഞ്ചികോഡ്” എന്ന ഹോളിവുഡ് ചിത്രം. വസ്തുത ഇതായിരിക്കേയാണ് ബൈബിളിന്റെ ചലച്ചിത്രരൂപമാണ് ഡാവിഞ്ചികോഡ് എന്ന വിചിത്രമായ കണ്ടെത്തല്‍ ശശികല നടത്തിയിരിക്കുന്നത്. അവരുടെ അറിവില്ലായ്മ കൊണ്ടാണ് ഇത്തരമൊരു വിഡ്ഢിത്തം പറഞ്ഞത് എന്നാണ് പൊതുവേയുള്ള വിലയിരുത്തല്‍.
മഹാഭാരതം എന്ന പേരില്‍ ഇറങ്ങുന്ന സിനിമയ്ക്ക് വേദഗ്രന്ഥമായ മഹാഭാരതത്തോട് സാമ്യമുണ്ടാകണമെന്നും ശശികല പറഞ്ഞു. രണ്ടാമൂഴമെന്ന നോവലിന് മഹാഭാരതം എന്ന പേരിടാന്‍ അനുവദിക്കില്ലെന്നും ശശികല പറഞ്ഞു. മഹഭാരതത്തിന്റെ ഗ്രന്ഥകര്‍ത്താവ് വ്യാസനാണ്. ഇവിടുത്തെ എഴുത്തുക്കാര്‍ക്കുള്ള അവകാശവും, ആവിഷ്‌കാര സ്വാതന്ത്ര്യവും വ്യാസനുമുണ്ട്. മഹര്‍ഷിയായി എന്നത് കൊണ്ട് അതില്ലാതാകുന്നില്ലെന്നും ശശികല പറഞ്ഞു.
In Case You Missed: ദൈവത്തിനെ നേരിട്ട് വിളിക്കാനുള്ള ഫോണ്‍ നമ്പര്‍ കൈവശമുണ്ടെന്ന അവകാശവാദവുമായി പാസ്റ്റര്‍
സിനിമക്ക് രണ്ടാമൂഴം എന്ന പേരാണെങ്കില്‍ തങ്ങള്‍ എത്ര ഊഴം വേണമെങ്കിലും കാണും. പക്ഷെ മഹാഭാരതം എന്ന പേര് ഉപയോഗിക്കാനാകില്ല. എഴുത്തുകാരുടെയും സാഹിത്യകാരന്‍മാരുടേയും വിസര്‍ജ്ജന പറമ്പല്ല ഹിന്ദുവിന്റെ സംസ്‌കാരം. അങ്ങിനെ ഹിന്ദുത്വത്തെ അപമാനിക്കാന്‍ അനുവദിക്കില്ലെന്നും ശശികല കൂട്ടിച്ചേര്‍ത്തു.