ചെന്നൈ: സൂപ്പര്‍സ്റ്റാര്‍ രജനികാന്തിന്റെ പുതിയ ചിത്രം അണ്ണാത്തെയുടെ ഫസറ്റ് ലുക്ക് പോസ്റ്റര്‍ പുറത്തിറങ്ങിയതിന് ശേഷമുള്ള ആരാധകരുടെ പ്രവര്‍ത്തി അതിരു കടന്നു എന്ന വിമര്‍ശനം ശക്തമാവുന്നു.
ട്രിച്ചിക്കടുത്ത്, പൊതു സ്ഥലത്ത് വെച്ച് ആടിനെ വെട്ടി പോസ്റ്ററില്‍ രക്താഭിഷേകം നടത്തിയാണ് ആരാധകര്‍ പോസ്റ്റര്‍ റിലീസ് ആഘോഷിച്ചത്. സംഭവത്തിന്റെ ചിത്രങ്ങളും വീഡിയോകളും സമൂഹമാധ്യമങ്ങളില്‍ വ്യാപകമായി പ്രചരിച്ചതോടെയാണ് ആരാധകര്‍ പുലിവാല് പിടിച്ചിരിക്കുന്നത്.
ഇതാദ്യമായല്ല രജനി ആരാധകര്‍ മൃഗബലി നടത്തി സിനിമയുടെ ആഘോഷം നടത്തുന്നത്. എന്തിരന്റെ രണ്ടാം ഭാഗത്തിന്റെ റിലീസുമായി ബന്ധപ്പെട്ട് ഇത്തരത്തില്‍ ആടിനെ വെട്ടിയാണ് ആരാധകര്‍ ആഘോഷം നടത്തിയത്.
അതേസമയം സണ്‍ പിക്‌ചേഴ്‌സ് നിര്‍മിക്കുന്ന ചിത്രം നവംബര്‍ 4ന് ദീപാവലി സ്‌പെഷ്യല്‍ റിലീസായി ലോകമെമ്പാടുമുള്ള പ്രേക്ഷകരിലേക്ക് എത്തുമെന്നാണ് അണിയറപ്രവര്‍ത്തകര്‍ അറിയിച്ചിട്ടുള്ളത്.
പ്രേക്ഷകരെ വൈകാരികമായി ബന്ധിപ്പിക്കാന്‍ കഴിവുള്ള ചിത്രമാണ് അണ്ണാത്തെ എന്നാണ് ചിത്രത്തെക്കുറിച്ച് രജനികാന്ത് പറയുന്നത്. കുടുംബ പ്രേക്ഷകരെ സംതൃപ്തരാക്കുന്നതായിരിക്കും അണ്ണാത്തെയെന്നും താരം കൂട്ടിച്ചേര്‍ത്തു.
