ലണ്ടന്‍: ക്രിക്കറ്റ് ഇതിഹാസം സച്ചിന്‍ തെണ്ടുല്‍ക്കറെ പ്രശംസകൊണ്ട് മൂടി ഇംഗ്ലീഷ് ക്യാപ്റ്റന്‍ അലിസ്റ്റര്‍ കുക്ക് രംഗത്ത്. ലോകക്രിക്കറ്റ് ചരിത്രത്തില്‍ സമാനതകളില്ലാത്ത ഇതിഹാസ താരമായ സച്ചിന്‍. അദ്ദേഹവുമായി തന്നെ താരതമ്യപ്പെടുത്താന്‍ സാധിക്കില്ല, ഇംഗ്ലണ്ട് നായകന്‍ പറഞ്ഞു.

ടെസ്റ്റില് 10,000 റണ്‍സ് പിന്നിടുന്ന ഏറ്റവും പ്രായം കുറഞ്ഞ താരമെന്ന സച്ചിന്റെ റെക്കോര്‍ഡ് കഴിഞ്ഞ മാസം ശ്രീലങ്കക്കെതിരെ നടന്ന രണ്ടാം ടെസ്റ്റില്‍ കുക്ക് മറികടന്നിരുന്നു. ഇതിന് പിന്നാലെയാണ് സച്ചിനെ പ്രശംസിച്ച് കുക്ക് രംഗത്ത് വന്നിരിക്കുന്നത്.

എന്നാല്‍ ഏറ്റവും കുറഞ്ഞ ഇന്നിംഗ്‌സില്‍ 10,000 ക്ലബിലെത്തിയ താരമെന്ന റെക്കോര്‍ഡ് ഇപ്പോഴും സച്ചിന്റെ പേരിലാണ്. 10,000 റണ്‍സ് പിന്നിടുന്ന പന്ത്രണ്ടാമത്തെ താരമാണ് കുക്ക്.

ടെസ്റ്റില്‍ 200 ടെസ്റ്റുകളില് നിന്നായി 15,921 റണ്‍സ് സ്വന്തമാക്കിയ സച്ചിന്റെ നേട്ടം അദ്ദേഹത്തെക്കാള്‍ ആറായിരം റണ്‍സ് പിറകിലുള്ള തനിക്ക് എത്തിപ്പിടിക്കാന്‍ സാധിക്കില്ലെന്നും കുക്ക് വ്യക്തമാക്കി. ഈ റെക്കോര്‍ഡ് ഒരു ചരിത്ര പുരുഷന്‍ സ്ഥാപിച്ചതാണ്. ഞാന്‍ അങ്ങനെയല്ല കുക്ക് പറഞ്ഞു.

അതെസമയം കഴിഞ്ഞ ദിവസം കുക്ക് മറ്റൊരു നേട്ടത്തിനു കൂടി ഉടമയായി. എല്ലാ ഫോര്‍മാറ്റിലുമായി ഇംഗ്ലണ്ടിനായി ഏറ്റവും കൂടുതല്‍ റണ്‍സെടുത്ത രണ്ടാമത്തെ താരമെന്ന നേട്ടമാണ് കുക്ക് സ്വന്തമാക്കിയത്. ഇക്കാര്യത്തില്‍ ഇയാന്‍ ബെല്ലിനെയാണ് കുക്ക് മറികടന്നത്. 25 റണ്‍സ് കൂടി നേടിയാല്‍ ഒന്നാമതുളള കെവിന്‍ പീറ്റേഴ്‌സനെ കൂടി കുക്കിന് മറികടക്കാം.