ഹൈദരാബാദ്: ബി.ജെ.പി തെലങ്കാന അധ്യക്ഷന്‍ ജി. കിഷന്‍ റെഡ്ഡിയും സുഹൃത്തുക്കളും 11 പേരെ കൊലപ്പെടുത്തിയിട്ടുണ്ടെന്ന് യു.എസ് ഹാക്കറുടെ വെളിപ്പെടുത്തല്‍. 2014 മെയ് 12ന് 11 പേര് കിഷന്‍ റെഡ്ഡിയുടെ ഫാം ഹൗസില്‍വെച്ച് കൊല്ലപ്പെട്ടെന്നാണ് ഹാക്കറുടെ പുതിയ വെളിപ്പെടുത്തല്‍.
2014 ലോകസഭാ തെരഞ്ഞെടുപ്പില്‍ വോട്ടിങ് യന്ത്രങ്ങളില്‍ വന്‍ അട്ടിമറി നടന്നെന്ന ഗുരുതര വെളിപ്പെടുത്തല്‍ നടത്തിയതിനു പിന്നാലെയാണ് യു.എസ് ഹാക്കറുടെ പുതിയ വെളിപ്പെടുത്തല്‍.
എന്നാല്‍ ഹാക്കറുടെ ആരോപണം കിഷന്‍ റെഡ്ഡി തള്ളിയ്യിട്ടുണ്ട്. “ഞാനും എന്റെ സുഹൃത്തുക്കളും 11 പേരെ കൊന്നിട്ടുണ്ടെന്ന് ലാണ്ടനില്‍ വെച്ച് സൈദ് ശുജ എന്നു പേരുള്ള ഒരാള്‍ കോണ്‍ഗ്രസ് നേതാവ് കപില്‍ സിപലിന്റെ മുമ്പില്‍ വെച്ച് ആരോപിച്ചിരുന്നു. ഇ.വി.എം പ്രശ്‌നം നടക്കുമ്പോള്‍ കോണ്‍ഗ്രസ് ആയിരുന്നു ഭരിച്ചിരുന്നത്. പിന്നെ എങ്ങനെയാണ് ഞാന്‍ 11 പേരെ കൊല്ലുക”- കിഷന്‍ റെഡ്ഡി മാധ്യമങ്ങളോട് പറഞ്ഞു.
ഇ.വി.എം ഹാക്കിംഗ് പ്രശ്‌നത്തിലേയ്ക്ക് കോണ്‍ഗ്രസ് അനാവശ്യമായി തന്റെ പേര് വലിച്ചിടുകയാണെന്നും റെഡ്ഡി പറഞ്ഞു. വിഷയത്തില്‍ ഉന്നതതല അന്വേഷണം ആവശ്യപ്പെട്ട റെഡ്ഡി, തെലങ്കാനയിലും ആന്ധ്രാപ്രദേശിലും നിരവധി രാഷ്ട്രീയക്കാരെ കോണ്‍ഗ്രസ് ഇല്ലായ്മ ചെയ്തിട്ടുണ്ടെന്നും പറഞ്ഞു.
അതേസമയം, 11 പേര് കൊല്ലപ്പെട്ടതിനെ കുറിച്ച് ആന്ധ്രാ സര്‍ക്കാര്‍ അന്വേഷിക്കണമെന്ന് കപില്‍ സിബില്‍ ആവശ്യപ്പെട്ടു.
വി.എം നിരോധിക്കണമെന്ന ബി.എസ്.പി അധ്യക്ഷ മായാവതി ആവശ്യപ്പെട്ടിരുന്നു. 2019 ലോക്സഭാ തെരഞ്ഞെടുപ്പില്‍ ബാലറ്റ് പേപ്പര്‍ തിരിച്ചുകൊണ്ടുവരണമെന്നും മായാവതി പറഞ്ഞിരുന്നു.
“ലണ്ടന്‍ കേന്ദ്രമാക്കി പ്രവര്‍ത്തിക്കുന്ന സൈബര്‍ വിദഗ്ധരുടെ വെളിപ്പെടുത്തലിലൂടെ ഇ.വി.എമ്മുമായി ബന്ധപ്പെട്ടുള്ള നിഗൂഢത കൂടുതല്‍ ഗൗരവതരമാക്കിയിരിക്കുകയാണ്. രാജ്യത്തിന്റെ താല്‍പ്പര്യം മുന്‍നിര്‍ത്തി ഇ.വി.എം നിരോധിക്കേണ്ടത് അത്യാവശ്യമാണ്.”-മായാവതി പറഞ്ഞിരുന്നു.
ഇ.വി.എമ്മുകള്‍ ഹാക്ക് ചെയ്യാനാകുമെന്ന് പറഞ്ഞുകൊണ്ട് യു.എസ് ഹാക്കറായ സയ്ദ് ഷുജ ഇന്നലെയാണ് രംഗത്തെത്തിയത്. 2014 തെരഞ്ഞെടുപ്പില്‍ ഇ.വി.എമ്മുകള്‍ ഹാക്ക് ചെയ്യപ്പെട്ടെന്നും അദ്ദേഹം വെളിപ്പെടുത്തിയിരുന്നു.
തെരഞ്ഞെടുപ്പുകളില്‍ നടന്ന ഇ.വി.എം. ഹാക്കിങ്ങുകളെ കുറിച്ച് അറിയാമായിരുന്നതിനാലാണ് മുതിര്‍ന്ന ബി.ജെ.പി. നേതാവായ ഗോപിനാഥ് മുണ്ടെ കൊല്ലപ്പെട്ടതെന്നും, ഇലക്ട്രോണിക് വോട്ടിംഗ് മെഷീനുകളില്‍ നടന്ന തിരിമറികളെക്കുറിച്ച് വെളിപ്പെടുത്താനിരിക്കെയാണ് പത്രപ്രവര്‍ത്തക ഗൗരി ലങ്കേഷ് കൊല്ലപ്പെട്ടതെന്നും ഹാക്കത്തോണില്‍ അദ്ദേഹം വെളിപ്പെടുത്തിയിരുന്നു.