മുംബൈ: രാജ്യത്ത് കൊവിഡ് വ്യാപിക്കുന്ന സാഹചര്യത്തില്‍ മഹാരാഷ്ട്രയിലുള്ള ഫാക്ടറി അടച്ചിടാനൊരുങ്ങി ടാറ്റാ മോട്ടോര്‍സ്. പശ്ചിമ മഹാരാഷ്ട്രയിലെ ഫാക്ടറി അടച്ചിടാനാണ് കമ്പനി തീരുമാനിച്ചിരിക്കുന്നത്.
മഹാരാഷ്ട്രയിലാണ് രാജ്യത്ത് ഏറ്റവുമധികം കൊവിഡ് ബാധിതരുള്ളത്. ഇത് മുന്‍നിര്‍ത്തിയാണ് കമ്പനി ഈ തീരുമാനത്തിലേക്കെത്തിയിരിക്കുന്നത്. പ്രമുഖ ബ്രിട്ടീഷ് ബ്രാന്‍ഡുകളായ ജഗ്വാര്‍, ലാന്‍ഡ് റോവര്‍ എന്നീ കാറുകളുടെ നിര്‍മ്മാണ ശാലകളാണ് ഇവിടെയുള്ള
ത്.
മുംബൈ, പൂനെ എന്നീ നഗരങ്ങളില്‍ കടുത്ത നിയന്ത്രണങ്ങളാണ് സംസ്ഥാന സര്‍ക്കാര്‍ ഏര്‍പ്പെടുത്തിയിരിക്കുന്നത്. ഈ നഗരങ്ങളിലെ മാളുകളും ഓഫീസുകളും അടച്ചിടണമെന്ന് സര്‍ക്കാര്‍ നിര്‍ദ്ദേശിച്ചിരുന്നു. ഇവിടെയാണ് ടാറ്റ മോട്ടോര്‍സിന്റെ ഫാക്ടറികളും എഞ്ചിനീയറിങ് സെന്ററുകളുമുള്ളത്.
സ്ഥിതിഗതികള്‍ കൂടുതല്‍ രൂക്ഷമാവുകയാണെങ്കില്‍ ചൊവ്വാഴ്ചയോടെ പ്ലാന്റുകള്‍ പൂര്‍ണമായും അടച്ചിടുമെന്ന് കമ്പനിയുടെ മാനേജിങ് ഡയറക്ടര്‍ അറിയിച്ചു. മാര്‍ച്ച് 31 വരെ അടച്ചിടാനാണ് ഇപ്പോഴത്തെ തീരുമാനം.
സംസ്ഥാനത്തെ വരും ദിവസങ്ങളിലുള്ള അവസ്ഥ അപ്പപ്പോള്‍ മനസിലാക്കി കൂടുതല്‍ ഫാക്ടറികളും ഓഫീസുകളും അടച്ചിടുന്ന കാര്യത്തില്‍ തീരുമാനമെടുക്കുമെന്നും അദ്ദേഹം അറിയിച്ചു.
രാജ്യത്തെ ഏറ്റവും വലിയ ട്രക്ക് നിര്‍മ്മാതാക്കളായ ടാറ്റയ്ക്ക് നിരവധി നിര്‍മ്മാണ യൂണിറ്റുകളാണ് രാജ്യത്തുടനീളമുള്ളത്. പൂനെയിലാണ് കാര്‍, ട്രക്ക് എന്നിവ ഏറ്റവും കൂടുതല്‍ നിര്‍മ്മിക്കുന്നത്.
ഏപ്രില്‍ 20 വരെ ജഗ്വര്‍ ലാന്‍ഡ് റോവര്‍ യു.കെയില്‍നിന്നുള്ള നിര്‍മ്മാണം താല്‍ക്കാലികമായി നിര്‍ത്തിവെക്കുകയാണെന്നും സ്ലോവാക്യയിലെ പ്ലാന്റ് അടച്ചിടുകയാണെന്നും അറിയിച്ചിട്ടുണ്ട്.
താല്‍ക്കാലിക ജീവനക്കാര്‍ക്കും ദിവസവേതന തൊഴിലാളികള്‍ക്കും മാര്‍ച്ച്, ഏപ്രില്‍ മാസങ്ങളിലെ ശമ്പളവും നല്‍കുമെന്നും ടാറ്റാ സണ്‍സ് ചെയര്‍മാര്‍ എന്‍. ചന്ദ്രശേഖരന്‍ പറഞ്ഞു. കൊവിഡ് നിരീക്ഷണത്തിലാവുകയോ ഫാക്ടറികളും പ്ലാന്റുകളും അടിച്ചിടുകയോ ചെയ്യുന്ന സാഹചര്യത്തില്‍ തൊഴിലാളികള്‍ക്ക് ജോലിയില്‍ പ്രവേശിക്കാന്‍ കഴിയില്ലെങ്കില്‍ പോലും ശമ്പളം നല്‍കുമെന്നും അദ്ദേഹം അറിയിച്ചു.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
ഡൂൾന്യൂസ് യൂട്യൂബ് ചാനൽ സബ്സ്ക്രൈബ് ചെയ്യാനായി ഇവിടെ ക്ലിക്ക് ചെയ്യൂ