നീണ്ട 27 വര്‍ഷങ്ങള്‍ക്ക് ശേഷം ഇന്ത്യയെ ഒരു ഏകദിന സീരീസില്‍ പരാജയപ്പെടുത്തിരിക്കുകയാണ് ശ്രീലങ്ക. ഇരുവരും തമ്മില്‍ നടന്ന ഏകദിന പരമ്പരയിലെ അവസാന മത്സരത്തില്‍ 110 റണ്‍സിന്റെ വമ്പന്‍ തോല്‍വിയായിരുന്നു ഇന്ത്യ ഏറ്റുവാങ്ങിയത്. ആര്‍. പ്രേമദാസ സ്റ്റേഡിയത്തില്‍ ലങ്ക ഉയര്‍ത്തിയ 248 റണ്‍സ് മറികടക്കാനാകാതെ ഇന്ത്യ 26.1 ഓവറില്‍ 138 റണ്‍സിന് ഓള്‍ ഔട്ട് ആവുകയായിരുന്നു.
ഈ തോല്‍വിക്ക് പിന്നാലെ പലരും ഇന്ത്യന്‍ ടീമിനെ വിമര്‍ശിച്ച് രംഗത്ത് വന്നിരുന്നു. അത്തരത്തില്‍ മുന്‍ ഇന്ത്യതാരം തന്‍വീര്‍ അഹമ്മദ് ഇന്ത്യന്‍ ടീമിനെക്കുറിച്ച് സംസാരിച്ചിരുന്നു. രോഹിത് ശര്‍മയും വിരാട് കോഹ്‌ലിയും ജസ്പ്രീത് ബുംറയുമില്ലെങ്കില്‍ ഇന്ത്യന്‍ ടീമിനെ പാകിസ്ഥാന് എളുപ്പത്തില്‍ തോല്‍പ്പിക്കാന്‍ കഴിയുമെന്നാണ് തന്‍വീര്‍ പറഞ്ഞത്.
‘ആദ്യം നിങ്ങള്‍ പാകിസ്ഥാന് നിര്‍ദേശങ്ങള്‍ നല്‍കുന്നതിന് മുമ്പ് നിങ്ങളുടെ പ്രകടനങ്ങള്‍ വിലയിരുത്തുക. രോഹിത്തും വിരാടും ബുംറയുമില്ലെങ്കി ഇന്ത്യ ദുര്‍ബലരാണ്. ഭാവിയില്‍ ഇന്ത്യന്‍ ബാറ്റിങ് യൂണിറ്റിന് എന്ത് സംഭവിക്കുമെന്ന് നിങ്ങള്‍ കണ്ടോളൂ. ബൗളിങ് മികച്ചതാവും,
പക്ഷേ ബാറ്റിങ് നിര ബുദ്ധിമുട്ടും. വിരാടും രോഹിത്തും ഒഴികെ ഇപ്പോള്‍ ഇന്ത്യന്‍ ടീമിലെ എല്ലാ പുതിയ ബാറ്റര്‍മാര്‍ക്കും ഭാവിയില്‍ ടീമിനെ മുന്നോട്ട് കൊണ്ടുപോകാന്‍ കഴിയില്ല,’ അദ്ദേഹം ക്രിക്കറ്റ് പാകിസ്ഥാനെ ഉദ്ധരിച്ച് പറഞ്ഞു.
