ചെന്നൈ: ഭക്തർ അർപ്പിച്ച, ഉപയോഗിക്കാതെ കിടക്കുന്ന 1,000 കിലോയിലധികം വരുന്ന സ്വർണ്ണാഭരണങ്ങൾ ഉരുക്കാൻ തീരുമാനിച്ച് തമിഴ്‌നാട് സർക്കാർ. 21 ക്ഷേത്രങ്ങളിൽ നിന്ന് ഉപയോഗിക്കാത്ത 1,000 കിലോയിലധികം സ്വർണ്ണം ഉരുക്കി 24 കാരറ്റ് സ്വർണ്ണക്കട്ടികളാക്കി മാറ്റിയതായി സംസ്ഥാന സർക്കാർ പറഞ്ഞു. സ്വർണ്ണ നിക്ഷേപ പദ്ധതി പ്രകാരം ഈ ബാറുകൾ സ്റ്റേറ്റ് ബാങ്ക് ഓഫ് ഇന്ത്യയിൽ നിക്ഷേപിച്ചതായും, പ്രതിവർഷം 17.81 കോടി രൂപയുടെ പലിശ ലഭിക്കുന്നതായും സർക്കാർ റിപ്പോർട്ട് ചെയ്തു.

മുംബൈയിലെ ഗവൺമെന്റ് മിന്റിലാണ് സ്വർണ്ണം ഉരുക്കിയത്. സ്വർണ്ണത്തിൽ നിന്ന് ലഭിക്കുന്ന പലിശ ക്ഷേത്രങ്ങൾ മെച്ചപ്പെടുത്തുന്നതിനും വികസിപ്പിക്കുന്നതിനുമായി തന്നെയാണ് ഉപയോഗിക്കുക. ഹിന്ദു റിലീജിയസ് ആൻഡ് ചാരിറ്റബിൾ എൻഡോവ്‌മെന്റ്‌സ് മന്ത്രി പി. കെ. ശേഖർ ബാബു തമിഴ്‌നാട് നിയമസഭയിൽ ഈ വിവരങ്ങൾ പങ്കുവെക്കുകയായിരുന്നു.

21 ക്ഷേത്രങ്ങളില്‍ നിന്നായി 10,74,123.488 ഗ്രാം സ്വര്‍ണമാണ് ശേഖരിച്ചത്. തിരുച്ചിറപ്പള്ളി ജില്ലയിലെ അരുള്‍മിഗു മാരിയമ്മന്‍ ക്ഷേത്രത്തില്‍ നിന്നാണ് ഏറ്റവും കൂടുതല്‍ സ്വര്‍ണം ശേഖരിച്ചത്. ഇന്‍വെസ്റ്റ്‌മെന്റ് സ്‌കീമിന് കീഴില്‍ 424.26 കിലോഗ്രാം സ്വര്‍ണമാണ് ഈ ക്ഷേത്രത്തില്‍ നിന്നും ശേഖരിച്ചത്. സ്‌കീം കൃത്യമായി നടപ്പിലാക്കുന്നെന്ന് ഉറപ്പുവരുത്താന്‍ മൂന്ന് റീജിയണല്‍ കമ്മിറ്റികളെ നിയോഗിച്ചിട്ടുണ്ട്. ഓരോ കമ്മിറ്റിയും നയിക്കുന്നത് വിരമിച്ച ജഡ്ജിമാരാണ്. ഇവരാണ് ഇതിന്റെ മേല്‍നോട്ടവും പരിശോധനകളുമടക്കം നടത്താന്‍ നിയോഗിക്കപ്പെട്ടവര്‍.

സ്വർണ്ണത്തിന് പിന്നാലെ, ഉപയോഗിക്കാത്ത വെള്ളി വസ്തുക്കളും ഉരുക്കാൻ ക്ഷേത്രങ്ങൾക്ക് സർക്കാർ അനുമതി നൽകിയിട്ടുണ്ട്. അതനുസരിച്ച്, ക്ഷേത്രങ്ങളിലെ ഉപയോഗിക്കാത്ത വെള്ളി വസ്തുക്കൾ ഉരുക്കുന്നതിനുള്ള നടപടികൾ നിലവിൽ സ്വീകരിച്ചുവരികയാണെന്ന് മന്ത്രി കൂട്ടിച്ചേർത്തു.

ഈ വസ്തുക്കൾ സർക്കാർ അംഗീകൃത സ്വകാര്യ കമ്പനികൾ ശുദ്ധമായ വെള്ളിക്കട്ടികളാക്കി മാറ്റും. മൂന്ന് ജഡ്ജിമാരുടെ നേതൃത്വത്തിലുള്ള സോണൽ കമ്മിറ്റികളുടെ മേൽനോട്ടത്തിൽ ക്ഷേത്ര സ്ഥലങ്ങളിലാണ് വെള്ളി ഉരുക്കൽ നടക്കുക. വെള്ളി ഉരുക്കൽ പ്രക്രിയ ഇതിനകം ആരംഭിച്ചു കഴിഞ്ഞു.

Content Highlight: Tamil Nadu melts over 1,000 kg donated gold to invest for temple development