ടി-20 ലോകകപ്പിലെ ഓസ്‌ട്രേലിയ – ഒമാന്‍ മത്സരത്തിന് മുന്നോടിയായി കങ്കാരുക്കള്‍ക്ക് മുന്നറിയിപ്പുമായി ഒമാന്‍ നായകന്‍ ആഖിബ് ഇല്യാസ്. ഗ്രൂപ്പ് ബി-യില്‍ ജൂണ്‍ ആറിനാണ് ഓസ്‌ട്രേലിയ – ഒമാന്‍ മത്സരം അരങ്ങേറുന്നത്. ബാര്‍ബഡോസിലെ കെന്‍സിങ്ടണ്‍ ഓവലാണ് വേദി.
തങ്ങള്‍ക്ക് ഒന്നും തന്നെ നഷ്ടപ്പെടാനില്ലെന്നും ഈ മത്സരത്തില്‍ എന്തും സംഭവിക്കാമെന്നും ഇല്യാസ് പറഞ്ഞു. മത്സരത്തിന് മുന്നോടിയായി മാധ്യമങ്ങളോട് സംസാരിക്കവെയാണ് ഒമാന്‍ നായകന്‍ ഇക്കാര്യം പറഞ്ഞത്.
‘ഞങ്ങള്‍ക്ക് ഒന്നും തന്നെ നഷ്ടപ്പെടാനില്ല. എല്ലാ ലോകകപ്പുകളിലും അട്ടിമറികള്‍ ഉണ്ടാകുമല്ലോ… എന്തും സംഭവിക്കാം. ഒരു ടീം എന്ന നിലയില്‍ ഞങ്ങള്‍ ഓസ്‌ട്രേലിയയെ ഒരുപാട് ബഹുമാനിക്കുന്നു. എന്നാല്‍ മത്സരത്തിന് മുമ്പ് അവരെ ഭയപ്പെടാതെ ഇരിക്കേണ്ടത് ഏറെ പ്രധാനമാണ്.
ഓസ്‌ട്രേലിയന്‍ നിരയില്‍ നിരവധി മികച്ച താരങ്ങളുണ്ട്. മത്സരശേഷം അവരില്‍ നിന്നും ഞങ്ങള്‍ക്ക് ഏറെ പഠിക്കാനുമുണ്ട്. ഒരുപക്ഷേ അവര്‍ക്ക് ഞങ്ങളില്‍ നിന്നും ചിലത് പഠിക്കാനുണ്ടായേക്കും,’ ഇല്യാസ് പറഞ്ഞു.
നമീബിയക്കെതിരായ ആദ്യ മത്സരത്തില്‍ ലഭിച്ചതിന് സമാനമായ പിച്ചാണ് ഓസ്‌ട്രേലിയക്കെതിരായ മത്സരത്തിലുമുള്ളതെങ്കില്‍ കങ്കാരുക്കള്‍ക്ക് ഭീഷണിയാകാന്‍ സാധിക്കുമെന്നും അദ്ദേഹം പറഞ്ഞു.
നമീബിയക്കെതിരായ മത്സരത്തില്‍ സൂപ്പര്‍ ഓവറില്‍ ഒമാന്‍ പരാജയപ്പെടുകയായിരുന്നു. എന്നാല്‍ മത്സരത്തില്‍ ടീമിന്റെ സ്പിന്നര്‍മാര്‍ മികച്ച പ്രകടനമാണ് കാഴ്ചവെച്ചത്. ഇത് ഓസ്‌ട്രേലിയക്കെതിരെയും ആവര്‍ത്തിക്കാന്‍ സാധിക്കുമെന്നാണ് അദ്ദേഹം പറഞ്ഞത്.
‘കഴിഞ്ഞ മത്സരത്തില്‍ പന്ത് എത്രത്തോളം മികച്ച രീതിയില്‍ ടേണ്‍ ചെയ്‌തെന്നും താഴ്ന്ന് തന്നെ സഞ്ചരിച്ചുവെന്നും നിങ്ങള്‍ കണ്ടതല്ലേ.
സ്റ്റീവ് സ്മിത്തിനെയും മാര്‍നസ് ലബുഷാനെയും പോലെ മികച്ച ടെക്‌നിക്കുള്ള ബാറ്റര്‍മാര്‍ ഓസ്‌ട്രേലിയക്ക് മുമ്പ് ഉണ്ടായിരുന്നു. എന്നാല്‍ ഇപ്പോള്‍ അങ്ങനെയല്ല. അവര്‍ ഓരോ പന്തും അടിച്ചുപറത്താനാണ് ശ്രമിക്കുന്നത്. അവര്‍ സിക്‌സറുകള്‍ മാത്രമാണ് ലക്ഷ്യമിടുന്നത്.
നമീബിയക്കെതിരായ മത്സരത്തില്‍ ലഭിച്ചതിന് സമാനമായ പിച്ച് ഞങ്ങള്‍ക്ക് ലഭിക്കുകയാണെങ്കില്‍ അത് ഓസ്‌ട്രേലിയക്ക് വലിയ പ്രശ്‌നം തന്നെയായി മാറിയേക്കാം.
മികച്ച സ്പിന്നര്‍മാരുള്ള ഞങ്ങള്‍ സ്ലോ പിച്ചില്‍ മികച്ച മനോഭാവത്തോടെ കളിക്കുകയാണ് വേണ്ടത്. കൃത്യമായ സ്ഥലങ്ങളില്‍ പിച്ച് ചെയ്യിക്കുകയാണ് വേണ്ടത്.
കാരണം എതിരെ നില്‍ക്കുന്നത് എത്രത്തോളം പേരും പെരുമയുമുള്ള ബാറ്ററാണെന്ന് പന്തിന് അറിയില്ല. പന്ത് താഴ്ന്ന് തന്നെ തുടരുകയോ അല്‍പം ടേണ്‍ ലഭിക്കുകയോ ചെയ്താല്‍ ബാറ്റര്‍ കുഴപ്പത്തിലാകും,’ അദ്ദേഹം കൂട്ടിച്ചേര്‍ത്തു.
