സയ്യിദ് മുഷ്താഖ് അലി ട്രോഫിക്കുള്ള ടീം പ്രഖ്യാപിച്ച് മുംബൈ ക്രിക്കറ്റ് അസോസിയേഷന്‍. സൂപ്പര്‍ താരം ശ്രേയസ് അയ്യരിനെ ക്യാപ്റ്റനാക്കി 17 അംഗ സ്‌ക്വാഡാണ് എം.സി.എ പ്രഖ്യാപിച്ചിരിക്കുന്നത്. അയ്യരിന് പുറമെ സൂപ്പര്‍ താരങ്ങളായ അജിന്‍ക്യ രഹാനെയും പൃഥ്വി ഷായും ടീമിന്റെ ഭാഗമാണ്.
ഐ.പി.എല്‍ താരലേലത്തിന് ഒരു ദിവസം മുമ്പ്, നവംബര്‍ 23നാണ് ടൂര്‍ണമെന്റ് ആരംഭിക്കുന്നത്. അഞ്ച് ഗ്രൂപ്പുകളിലായി 38 ടീമുകളാണ് ടൂര്‍ണമെന്റില്‍ മാറ്റുരയ്ക്കുന്നത്. ആദ്യ ദിവസമായ 23ന് വിവിധ ഗ്രൗണ്ടുകളിലായി 18 മത്സരങ്ങള്‍ അരങ്ങേറും.
ഐ.പി.എല്‍ താര ലേലത്തില്‍ ഷോര്‍ട്ട്‌ലിസ്റ്റ് ചെയ്യപ്പെട്ട താരങ്ങള്‍ക്ക് ലേലത്തിന് മുമ്പ് പലതും തെളിയിക്കാന്‍ ലഭിക്കുന്ന അവസാന അവസരമാണ് ഈ മത്സരങ്ങള്‍.
ആദ്യ മത്സരത്തില്‍ ഗോവയെയാണ് മുംബൈക്ക് നേരിടാനുള്ളത്. ഹൈദരാബാദ് ഉപ്പലിലെ രാജീവ് ഗാന്ധി അന്താരാഷ്ട്ര സ്റ്റേഡിയത്തിലാണ് മത്സരം. ഗ്രൂപ്പ് ഇ-യിലാണ് മുംബൈയും ഗോവയും സ്ഥാനം പിടിച്ചിരിക്കുന്നത്.
ബി.സി.സി.യുടെ സംഘടിപ്പിക്കുന്ന ആഭ്യന്തര ടി-20 ക്രിക്കറ്റ് ടൂര്‍ണമെന്റാണ് സയ്യിദ് മുഷ്താഖ് അലി ട്രോഫി (SMAT). മുന്‍ താരം സയ്യിദ് മുഷ്താഖ് അലിയുടെ സ്മരണാര്‍ത്ഥമാണ് ടൂര്‍ണമെന്റ് സംഘടിപ്പിക്കുന്നത്. രഞ്ജി കളിക്കുന്ന ടീമുകള്‍ തന്നെയാണ് ഈ ടൂര്‍ണമെന്റിലും കളിക്കുന്നത്.
2006-07 സീസണിലാണ് ടൂര്‍ണമെന്റ് ആരംഭിച്ചത്. ഉദ്ഘാടന സീസണില്‍ ദിനേഷ് കാര്‍ത്തിക്കിന്റെ നേതൃത്വത്തിലുള്ള തമിഴ്‌നാടാണ് ആദ്യ കിരീടം സ്വന്തമാക്കിയത്.
