1993ല്‍ പുറത്തിറങ്ങിയ മലയാളത്തിലെ എക്കാലത്തെയും മികച്ച ചിത്രമാണ് മണിച്ചിത്രത്താഴ്. മധു മുട്ടം തിരക്കഥ രചിച്ച ചിത്രത്തിന്റെ സംവിധാനം നിര്‍വഹിച്ചിരിക്കുന്നത് ഫാസിലാണ്. സിദ്ദിഖ്-ലാല്‍, പ്രിയദര്‍ശന്‍, സിബി മലയില്‍ എന്നിവര്‍ ഈ ചിത്രത്തിന്റെ രണ്ടാം യൂണിറ്റ് സംവിധായകരായിരുന്നു.
ശോഭന, മോഹന്‍ലാല്‍, സുരേഷ് ഗോപി, തുടങ്ങിയവര്‍ പ്രധാന കഥാപാത്രങ്ങളെ അവതരിപ്പിച്ച ചിത്രത്തിന് ആ വര്‍ഷത്തെ ജനപ്രിയ ചിത്രത്തിനുള്ള ദേശീയ-സംസ്ഥാന പുരസ്‌കാരങ്ങള്‍ ലഭിച്ചു. നാഗവല്ലിയായും ഗംഗയായും പ്രേക്ഷകരെ വിസ്മയിപ്പിച്ച ശോഭന അതേ വര്‍ഷത്തെ മികച്ച നടിക്കുള്ള ദേശീയ പുരസ്‌കാരവും നേടിയെടുത്തു.
സിനിമ ഡിസംബറില്‍ തന്നെ റീലിസ് ചെയ്യണമെന്നുള്ളത് കൊണ്ട് സംവിധായകന്‍ ഫാസില്‍, സിദ്ദിഖ്-ലാല്‍, പ്രിയദര്‍ശന്‍, സിബിമലയില്‍ തുടങ്ങിയ തന്റെ അടുത്ത സുഹൃത്തുക്കളും ശിക്ഷ്യരുമായ സംവിധായകരെ സിനിമയിലെ ചില ഭാഗങ്ങള്‍ ഷൂട്ട് ചെയ്യാനായി വിളിച്ചിരുന്നെന്ന് ദി ക്യൂ സ്റ്റുഡിയോയ്ക്ക് നല്‍കിയ അഭിമുഖത്തില്‍ സ്വര്‍ഗ്ഗചിത്ര അപ്പച്ചന്‍ പറയുന്നു.
ഫാസില്‍ ചില സീനുകള്‍ പ്രിയദര്‍ശനും സിദ്ദിഖ്-ലാലിനും സിബി മലയിലിനും ഷൂട്ട് ചെയ്യാനായി കൊടുക്കുമെന്നും അവര്‍ ഫാസിലിന് ഇഷ്ട്ടപ്പെടുന്ന രീതിയില്‍ അവ ഷൂട്ട് ചെയ്യുമെന്നും സ്വര്‍ഗ്ഗചിത്ര അപ്പച്ചന്‍ കൂട്ടിച്ചേര്‍ത്തു.
സിനിമയില്‍ പപ്പുവിന്റെ സീനുകളും മറ്റ് ഹ്യൂമര്‍ രംഗങ്ങളെല്ലാം അത്തരത്തില്‍ സിദ്ദിഖ്-ലാല്‍ എടുത്ത സീനാണെന്നും അദ്ദേഹം വ്യക്തമാക്കി. സിനിമയില്‍ ഏറ്റവും കൂടുതല്‍ ചിരിപ്പിക്കുന്ന രംഗങ്ങളില്‍ ഒന്നായ ‘കക്കൂസില്‍ പോണമെടാ’ എന്ന സീനും ഷൂട്ട് ചെയ്തത് സിദ്ദിഖ്-ലാലാണ്.
ഹിന്ദിയിലടക്കം നിരവധി ഭാഷകളിലേക്ക് മണിച്ചിത്രത്താഴ് റീമേക്ക് ചെയ്തിരുന്നു. എല്ലാ ഭാഷകളിലെ റീമേക്കും വന്‍ വിജയമായിരുന്നു. കന്നടയില്‍ ആപ്തമിത്ര, തമിഴിലും തെലുങ്കിലും ചന്ദ്രമുഖി, ഹിന്ദിയില്‍ ഭൂല്‍ ഭുലയ്യ എന്നീ പേരുകളിലാണിവ ഇറങ്ങിയത്. മണിച്ചിത്രത്താഴിന്റെ റീ റിലീസ് ഓഗസ്റ്റ് 17നാണ്.
Content Highlight: Swargachitra Appacha Talks about Manichitrathazhu and siddique lal
