ഇപ്പോള്‍ സിനിമാപ്രേമികള്‍ ഏറ്റവും ആകാംക്ഷയോടെ കാത്തിരിക്കുന്ന സിനിമയാണ് കങ്കുവ. സൂര്യ നായകനാകുന്ന ഈ ചിത്രം സംവിധാനം ചെയ്യുന്നത് ശിവയാണ്. ശിവയും കാര്‍ത്തിയും താനും കുട്ടിക്കാലം മുതല്‍ക്കേ കൂട്ടുകാരാണെന്ന് പറയുകയാണ് സൂര്യ. ശിവയെ തനിക്ക് വളരെ ചെറുപ്പം മുതല്‍ക്കേ തന്നെ അറിയാമെന്നും ഇത്ര ചെറുപ്പത്തില്‍ തന്നെ എഡിറ്ററായ ഒരാളെ താന്‍ വേറെ കണ്ടിട്ടില്ലെന്നും നടന് പറയുന്നു.
മലയാള സിനിമയില്‍ സിനിമറ്റോഗ്രാഫര്‍ സംവിധായകനാകുമെന്നും സ്റ്റില്‍ ഫോട്ടോഗ്രാഫര്‍ മ്യൂസിക് ഡയറക്ടറാകുമെന്നും പറഞ്ഞ സൂര്യ മലയാളത്തില്‍ എല്ലാവരും കലക്കുകയാണെന്നും കൂട്ടിച്ചേര്‍ത്തു. എന്നാല്‍ തമിഴ് സിനിമയില്‍ എല്ലാ കാര്യങ്ങളെ കുറിച്ചും അറിയുന്ന സംവിധായകന് ഉണ്ടാകുന്നത് വലിയ കാര്യമാണെന്നാണ് സൂര്യ പറയുന്നത്.
സി.ജി.ഐ മുതല്‍ സിനിമയില്‍ എല്ലാ ഡിപ്പാര്‍ട്ട്‌മെന്റിനെ കുറിച്ചും ശിവക്ക് കൃത്യമായി അറിവുണ്ടെന്നും അങ്ങനെയുള്ള ഒരാളെ കാണുകയെന്നത് അത്ര എളുപ്പമല്ലെന്നും നടന് പറയുന്നു. കങ്കുവയുടെ പ്രൊമോഷന്റെ ഭാഗമായി നടന്ന പ്രസ് മീറ്റില്‍ സംസാരിക്കുകയായിരുന്നു സൂര്യ.
‘ശിവയും കാര്‍ത്തിയും ഞാനുമെല്ലാം കുട്ടിക്കാലം തൊട്ടേ കൂട്ടുകാരാണ്. ശിവയെ എനിക്ക് ചെറുപ്പം മുതല്‍ക്കേ തന്നെ അറിയാം. അവന്റെ ബാക്ഗ്രൗണ്ടും എനിക്ക് നന്നായിട്ട് അറിയാവുന്നതാണ്. ഇത്ര ചെറുപ്പത്തില്‍ തന്നെ എഡിറ്ററായ ഒരാളെ ഞാന്‍ കണ്ടിട്ടില്ല.
ആറ് വര്‍ഷത്തോളം എഡിറ്ററായി വര്‍ക്ക് ചെയ്തതിന്റെ എക്‌സ്പീരിയന്‍സ് ശിവക്കുണ്ട്. അതിന് ശേഷമാണ് അവന്‍ ഒരു സിനിമറ്റോഗ്രാഫറായി മാറുന്നത്. എം.ജി.ആര്‍ ഗവണ്‍മെന്റ് ഫിലിം ഏന്‍ഡ് ടെലിവിഷന്‍ ട്രെയ്‌നിങ് ഇന്‍സ്റ്റിറ്റ്യൂട്ടില്‍ നിന്ന് ഗോള്‍ഡ് മെഡല്‍ കിട്ടിയ ആളാണ് ശിവ.
പിന്നീടാണ് അവന്‍ സംവിധായകനാകുന്നത്. ലിറ്ററേച്ചറിനെ കുറിച്ച് അങ്ങേയറ്റം അറിവുള്ള ആള് കൂടെയാണ് അവന്‍. തമിഴിലെ ഒട്ടുമിക്ക പുസ്തകങ്ങളും അവന്‍ വായിച്ചിട്ടുണ്ടാകും. സി.ജി.ഐ മുതല്‍ സിനിമയില്‍ എല്ലാ ഡിപ്പാര്‍ട്ട്‌മെന്റിനെ കുറിച്ചും കൃത്യമായി അറിവുള്ള ഒരാളെ കാണുകയെന്നത് അത്ര എളുപ്പമല്ല.
ഒരു സംവിധായകന് അത്രത്തോളം അറിവ് ഉണ്ടാകുയെന്നത് വളരെ അപൂര്‍വമായ കാര്യമാണ്. മലയാളത്തില്‍ സിനിമറ്റോഗ്രാഫര്‍ സംവിധായകനാകും, സ്റ്റില്‍ ഫോട്ടോഗ്രാഫര്‍ മ്യൂസിക് ഡയറക്ടറാകും. മലയാളത്തില്‍ എല്ലാവരും കലക്കുകയാണ് (ചിരി). പക്ഷെ ഞങ്ങള്‍ തമിഴ് സിനിമയില്‍ ഉള്ളവര്‍ക്ക് അത് വലിയ കാര്യമാണ്,’ സൂര്യ പറഞ്ഞു.
Content Highlight: Suriya Talks About Director Shiva And Malayalam Cinema