തമിഴിലെ മികച്ച നടന്മാരില്‍ ഒരാളാണ് സൂര്യ. കഴിഞ്ഞ കുറച്ചു കാലങ്ങളായി താരത്തിന് വലിയൊരു ഹിറ്റ് എടുത്തുപറയാന്‍ ഇല്ല. സൂര്യയുടെ ഏറ്റവും പുതിയ ചിത്രമായ കങ്കുവ റിലീസിന് തയാറെടുക്കുകയാണ്. വന്‍ ബജറ്റിലൊരുങ്ങുന്ന ചിത്രത്തിന്റെ ഓരോ അപ്‌ഡേറ്റിനും വന്‍ സ്വീകാര്യതയാണ് ലഭിക്കുന്നത്. ചിത്രത്തിന്റെ പ്രൊമോഷനുമായി ബന്ധപ്പെട്ട് തിരുവനന്തപുരത്ത് നടന്ന ഇവന്റില്‍ കമല്‍ ഹാസനെക്കുറിച്ച് സംസാരിച്ച വാക്കുകളാണ് ഇപ്പോള്‍ സോഷ്യല്‍ മീഡിയയില്‍ വൈറല്‍.

തന്റെ ഓരോ വിജയത്തിലും തോല്‍വിയിലും ചേര്‍ത്തുപിടിക്കുന്നയാളാണ് കമല്‍ ഹാസനെന്ന് സൂര്യ പറഞ്ഞു. സിനിമയില്‍ തന്റെ ഏറ്റവും വലിയ ഇന്‍സ്പിറേഷനാണ് കമല്‍ ഹാസനെന്ന് സൂര്യ കൂട്ടിച്ചേര്‍ത്തു. ഹൈസ്‌കൂള്‍ ഡ്രോപ് ഔട്ട് ആയ അദ്ദേഹത്തിന് എട്ട് ഭാഷകള്‍ അറിയാമെന്നും സിനിമയുടെ എല്ലാ മേഖലയിലും അഗാധമായ അറിവുണ്ടെന്നും സൂര്യ പറഞ്ഞു.

2008ല്‍ വാരണം ആയിരം എന്ന ചിത്രം ചെയ്ത ശേഷം താന്‍ ആ സിനിമയെപ്പറ്റി സംസാരിക്കാന്‍ കമല്‍ ഹാസന്റെയടുത്ത് പോയിരുന്നെന്നും ആ സിനിമക്കായി താന്‍ നടത്തിയ കഷ്ടപ്പാട് അദ്ദേഹത്തെ കാണിക്കാം എന്ന ചിന്തയിലുമാണ് പോയതെന്നും സൂര്യ കൂട്ടിച്ചേര്‍ത്തു. എന്നാല്‍ ആ സമയത്ത് അദ്ദേഹം ദശാവതാരം എന്ന സിനിമ ചെയ്ത് തന്നെ മാത്രമല്ല, മൊത്തം സിനിമാലോകത്തെയും അത്ഭുതപ്പെടുത്തിയിരുന്നെന്നും സൂര്യ പറഞ്ഞു.

ഇപ്പോള്‍ എ.ഐയെപ്പറ്റിയുള്ള കോഴ്‌സ് പഠിക്കാന്‍ യു.എസ്സില്‍ പോയിരിക്കുകയാണെന്നും സിനിമയോട് അദ്ദേഹത്തിനുള്ള പാഷന്‍ മറ്റുള്ളവര്‍ക്ക് എക്കാലവും വലിയ പാഠമാണെന്നും സൂര്യ കൂട്ടിച്ചേര്‍ത്തു. നമുക്ക് ഇഷ്ടപ്പെട്ട മേഖല ഏതായാലും അതിനോട് അതിയായ പാഷന്‍ കാണിക്കണമെന്നതിന്റെ ഏറ്റവും വലിയ ഉദാഹരണം കമല്‍ ഹാസനെന്നും സൂര്യ പറഞ്ഞു.

‘ഞാന്‍ സിനിമയില്‍ ഉണ്ടായാലും ഇല്ലെങ്കിലും എനിക്ക് എല്ലായ്‌പ്പോഴും പ്രചോദനമായിരിക്കുന്ന വ്യക്തിയാണ് കമല്‍ ഹാസന്‍. ഹൈസ്‌കൂള്‍ ഡ്രോപ്പ് ഔട്ട് ആണെങ്കിലും എട്ട് ഭാഷകള്‍ അദ്ദേഹത്തിന് അറിയും. അത് മാത്രമല്ല, അദ്ദേഹത്തെക്കണ്ട് ഇന്‍സ്‌പെയറായി പല ഫിലിംമേക്കേഴ്‌സ് സിനിമയിലേക്ക് കടന്നുവന്നു.

1980ല്‍ തന്നെ അദ്ദേഹം പാന്‍ ഇന്ത്യന്‍ സ്റ്റാറായ നടനാണ് അദ്ദേഹം. എന്റെ ഓരോ തോല്‍വിയിലും വിജയത്തിലും എന്നെ ചേര്‍ത്തുപിടിക്കുന്ന നടനാണ് അദ്ദേഹം. 2008ല്‍ വാരണം ആയിരം എന്ന സിനിമ ചെയ്തതിന് ശേഷം ഞാന്‍ കമല്‍ സാറിനെ കാണാന്‍ ചെന്നിരുന്നു. ആ സിനിമയില്‍ രണ്ട് ഗെറ്റപ്പില്‍ വന്നതും, സിക്‌സ് പാക്ക് കാണിക്കുന്നതും എങ്ങനെയുണ്ടെന്നുള്ള അഭിപ്രായം കേള്‍ക്കാന്‍ വേണ്ടിയാണ് പോയത്.

എന്നാല്‍ ആ സമയത്ത് ദശാവതാരം എന്ന സിനിമ ചെയ്ത് എന്നെ മാത്രമല്ല, സിനിമാലോകത്തെ മുഴുവന്‍ അദ്ദേഹം ഞെട്ടിച്ചു. ഇപ്പോള്‍ എ.ഐയെപ്പറ്റിയുള്ള കോഴ്‌സിന് വേണ്ടി യു.എസ്സിലാണ് അദ്ദേഹം. നമുക്ക് ഇഷ്ടപ്പെട്ട മേഖല ഏതായാലും അതിനോട് അതിയായ പാഷന്‍ കാണിക്കണമെന്നതിന്റെ ഏറ്റവും വലിയ ഉദാഹരണമാണ് കമല്‍ സാര്‍,’ സൂര്യ പറയുന്നു.

Content Highlight: Suriya says that Kamal Haasan is his biggest inspiration