ഐ.പി.എല്‍ ആരംഭിച്ച 2008 മുതല്‍ ഇന്നുവരെ ടൂര്‍ണമെന്റിന്റെ ഭാഗമായി തുടരുന്ന അപൂര്‍വം താരങ്ങള്‍ മാത്രമാണുള്ളത്. അവരില്‍ പ്രധാനിയാണ് വിരാട് കോഹ്ലി. ഐ.പരി.എല്‍ ആരംഭിച്ചത് മുതല്‍ ഇന്നുവരെ ഒരു ടീമിനെ തന്നെ പ്രതിനിധീകരിച്ച ഏക താരവും വിരാട് തന്നെ.
എന്നാല്‍ 16 സീസണുകളില്‍ കളത്തിലിറങ്ങിയിട്ടും ഐ.പി.എല്ലിലെ എണ്ണിയാലൊടുങ്ങാത്ത നിരവധി റെക്കോഡുകള്‍ സ്വന്തമായി ഉണ്ടായിട്ടും ഒരു തവണ പോലും കിരീടം നേടാന്‍ വിരാടിന് സാധിച്ചിട്ടില്ല. രണ്ട് തവണ കിരീടത്തിന് തൊട്ടടുത്തെത്തി വീഴാനാണ് ബെംഗളൂരുവിന് വിധിയുണ്ടായിരുന്നത്.
വിരാട് കോഹ്ലി ഐ.പി.എല്‍ കിരീടം നേടാന്‍ അര്‍ഹനാണെന്ന് പറയുകയാണ് മുന്‍ ഇന്ത്യന്‍ സൂപ്പര്‍ താരവും ഐ.പി.എല്‍ ലെജന്‍ഡുമായ സുരേഷ് റെയ്‌ന. ടൈംസ് ഓഫ് ഇന്ത്യക്ക് നല്‍കിയ അഭിമുഖത്തിലാണ് റെയ്‌ന ഇക്കാര്യം പറഞ്ഞത്.
‘വിരാട് ഒരു ഐ.പി.എല്‍ ട്രോഫി അര്‍ഹിക്കുന്നുണ്ട്. കഴിഞ്ഞ വര്‍ഷങ്ങളില്‍ അവന്‍ ഇന്ത്യന്‍ ടീമിനും റോയല്‍ ചലഞ്ചേഴ്‌സിനും വേണ്ടി നിരവധി കാര്യങ്ങള്‍ ചെയ്തു. ആര്‍.സി.ബിയില്‍ അവന്‍ ഏറെ നേട്ടമുണ്ടാക്കിയിട്ടുണ്ട്. ഇതിന് പുറമെ വിരാടിനൊപ്പം കിരീടം നേടാന്‍ ആരാധകരും അര്‍ഹരാണ്,’ റെയ്‌ന പറഞ്ഞു.
അതേസമയം, റോയല്‍ ചലഞ്ചേഴ്‌സിന്റെ മത്സരത്തോടെയാണ് ഐ.പി.എല്‍ 2024ന് തുടക്കമാകുന്നത്. ഡിഫന്‍ഡിങ് ചാമ്പ്യന്‍മാരായ ചെന്നൈ സൂപ്പര്‍ കിങ്സ് ആണ് എതിരാളികള്‍. എതിരാളികളുടെ ഹോം സ്‌റ്റേഡിയയമായ ചെപ്പോക്കിലാണ് ആദ്യ മത്സരത്തിന് ആര്‍.സി.ബി ഇറങ്ങുന്നത്.
