ആദ്യമായി സിനിമയിലഭിനയിച്ച ശേഷം കോളേജിലെത്തിയപ്പോഴുണ്ടായ ദുരനുഭവം പങ്കുവെച്ച് നടി സുരഭി ലക്ഷ്മി.
ഗുല്‍മോഹര്‍ സിനിമയില്‍ അഭിനയിച്ചു കഴിഞ്ഞ സമയത്തായിരുന്നു സംഭവം. അന്ന് ഞാന്‍ യൂണിവേഴ്‌സിറ്റിയില്‍ പഠിക്കുകയാണ്.
അവിടെ പഠിച്ചുപോയൊരു സീനിയര്‍ പയ്യന്‍ ഗുല്‍മോഹര്‍ സിനിമയുടെ വിശേഷങ്ങള്‍ ചോദിച്ചുവന്നു. സിനിമയെ കുറിച്ചൊക്കെ പറഞ്ഞു കഴിഞ്ഞപ്പോള്‍ അവന്റെ അടുത്ത ചോദ്യം ഗുല്‍മോഹറില്‍ അഭിനയിക്കാന്‍ നീയെത്ര പേര്‍ക്ക്കിടന്നു കൊടുത്തിട്ടുണ്ടെന്നായിരുന്നു.
വേണംന്നു വച്ചിട്ടല്ല, ഞാനൊരൊറ്റയെണ്ണം പൊട്ടിച്ചു. അവന്‍ കറങ്ങി വന്നപ്പോ ഒന്നുകുടി പൊട്ടിച്ചു.
ഞാന്‍ ഒരു സാദാ പെണ്ണാണ്. എങ്കിലും വെറും സാധാരണക്കാരിയായ ഒരു പെണ്ണിന്റെ അടുത്തേക്ക് ആളുകള്‍ ഏതു തരത്തില്‍ ചോദ്യങ്ങള്‍ എറിയുന്നോ അതേ പോലെതിരിച്ചും എറിയാന്‍ കഴിവുള്ള ഒരാള്‍ തന്നെയാണ് താനെന്നും സുരഭി വ്യക്തമാക്കി.
അഭിനയിക്കുന്ന സിനിമയിലെ സിനിമക്കാരുമായി ബന്ധമുണ്ടാക്കാനോ അവരുടെയൊക്കെ നമ്പര്‍ വാങ്ങി “ചേട്ടാ അടുത്ത സിനിമയിലൊക്കെ വിളിക്കണേ എന്നു പറയാനോ എന്തുണ്ട് വിശേഷം ഹാപ്പി വിഷു എന്ന് കൊഞ്ചിക്കുഴയാനോ തന്നെ കിട്ടില്ലെന്നും സുരഭി പറയുന്നു.
വിവാഹിതയായ കാര്യം സുരഭി മറിച്ചുവെക്കുകയാണെന്നും മറ്റുമുള്ള തരത്തില്‍ അടുത്തിടെ ചില വാര്‍ത്തകള്‍ റിപ്പോര്‍ട്ട് ചെയ്യപ്പെട്ടിരുന്നു. എന്നാല്‍ വിഷയത്തില്‍ തനിക്ക് ഇപ്പോള്‍ പ്രതികരിക്കാന്‍ ബുദ്ധിമുട്ടുള്ളതുകൊണ്ടാണ് താന്‍ നിലപാട് വ്യക്തമാക്കാത്തതെന്നായിരുന്നു സുരഭിയുടെ മറുപടി.