പ്രശാന്ത് ഭൂഷണും ട്വിറ്റര്‍ ഇന്ത്യയ്ക്കും എതിരെ കോടതിയലക്ഷ്യത്തിന് കേസെടുത്ത് സുപ്രീംകോടതി
ഡൂള്‍ന്യൂസ് ഡെസ്‌ക്
Wednesday, 22nd July 2020, 8:24 am
ന്യൂദല്‍ഹി: മുതിര്‍ന്ന അഭിഭാഷകന്‍ പ്രശാന്ത് ഭൂഷനെതിരെ കോടതിയലക്ഷ്യത്തിന് സ്വമേധയാ കേസെടുത്ത് സുപ്രീംകോടതി.
ട്വിറ്റര്‍ ഇന്ത്യക്കെതിരെയും കോടതി കേസെടുത്തിട്ടുണ്ട്.
ജസ്റ്റിസുമാരായ അരുണ്‍ മിശ്ര, ബി.ആര്‍ ഗവായി, കൃഷ്ണ മുരാരി എന്നിവരടങ്ങിയ ബെഞ്ചാണ് കേസ് പരിഗണിക്കുക.
ഭൂഷനെതിരെയുള്ള നടപടിക്ക് പിന്നിലെ കാരണമെന്താണെന്ന് വ്യക്തമല്ല. പ്രശാന്ത് ഭൂഷന്റെ ട്വീറ്റ് സംബന്ധിച്ചാണ് കേസെടുത്തിരിക്കുന്നതെന്നാണ് വിവരങ്ങള്‍.
രാജ്യവ്യാപകമായി ലോക്ഡൗണ്‍ പ്രഖ്യാപിച്ച സമയത്ത് കുടിയേറ്റ പ്രതിസന്ധിയുമായി ബന്ധപ്പെട്ട കാര്യങ്ങള്‍ സുപ്രീംകോടതി കൈകാര്യം ചെയ്ത രീതിയെക്കുറിച്ച് അദ്ദേഹം വിമര്‍ശനം ഉന്നയിച്ചിരുന്നു.
ഭീമ-കൊറെഗാവ് കേസില്‍ ജയിലില്‍ കഴിയുന്ന വരവര റാവു, സുധാ ഭരദ്വാജ് തുടങ്ങിയവര്‍ക്ക് കൃത്യമായ ചികിത്സ നല്‍കാത്തതിനെതിരെയും അദ്ദേഹം പ്രസ്താവന നടത്തിയിരുന്നു.
