ന്യൂദല്‍ഹി: റംസാന്‍ മാസം പ്രമാണിച്ച് വോട്ടെടുപ്പ് കാലത്ത് അഞ്ച് മണിക്ക് ആരംഭിക്കണമെന്ന പൊതു താല്‍പര്യ ഹര്‍ജിയുടെ കാര്യത്തില്‍ തീരുമാനമെടുക്കണമെന്ന് തെരഞ്ഞെടുപ്പ് കമ്മീഷനോട് സുപ്രീം കോടതി. മുസ്‌ലിം മതവിശ്വാസികള്‍ വ്രതം ആചരിക്കുന്ന റംസാന്‍ മാസം മെയ് 5ന് ആരംഭിക്കുമെന്നാണ് കരുതുന്നത്.
ഏഴു ഘട്ടങ്ങളിലായി നടക്കുന്ന തെരഞ്ഞെടുപ്പിന്റെ മൂന്ന് ഘട്ടങ്ങള്‍ ഇനിയും നടക്കാനിരിക്കുന്നേയുള്ളൂ. മെയ് 6, മെയ് 12, മെയ് 19 തിയ്യതികളാലായണ് ഇനി തെരഞ്ഞെടുപ്പ് നടക്കാനിരിക്കുന്നത്.
നിലവില്‍ കാലത്ത് ഏഴിനാണ് വോട്ടെടുപ്പ് ആരംഭിക്കുന്നത്. എന്നാല്‍ റംസാന്‍ മാസത്തില്‍ രണ്ട് മണിക്കൂര്‍ നേരത്തെ ആംരഭിക്കണമെന്നാണ് ഹര്‍ജിക്കാരന്റെ ആവശ്യം. നിലവിലെ കാലാവസ്ഥാ സാഹചര്യങ്ങളും കണക്കിലെടുത്താണ് അഞ്ചു മണിക്ക് വോട്ടെടുപ്പ് ആരംഭിക്കണമെന്ന് ആവശ്യപ്പെടുന്നതെന്നും ഹര്‍ജിയില്‍ പറയുന്നുണ്ട്. വ്രതം അനുഷ്ഠിക്കുന്ന വോട്ടര്‍മാര്‍ക്ക് കനത്ത ചൂട് വോട്ടു ചെയ്യുന്നത് തടസ്സമാകാതിരിക്കാന്‍ ഇത് ഉപകരിക്കുമെന്നും ഹര്‍ജിയില്‍ പറയുന്നു.
