ടീമിന് ഭാരമാകാന്‍ ആഗ്രഹിക്കുന്നവനല്ല; വിരമിക്കാനല്ല! അപ്പോഴെങ്കിലും രോഹിത് സ്വയം ആ തീരുമാനമെടുക്കണമെന്ന് ഗവാസ്‌കര്‍

ടെസ്റ്റ് ഫോര്‍മാറ്റില്‍ ഇന്ത്യന്‍ നായകന്‍ രോഹിത് ശര്‍മയുടെ ക്യാപ്റ്റന്‍സിയുടെ ഭാവിയെ കുറിച്ച് സംസാരിക്കുകയാണ് മുന്‍ ഇന്ത്യന്‍ നായകനും ക്രിക്കറ്റ് അനലിസ്റ്റും കമന്റേറ്ററുമായ സുനില്‍ ഗവാസ്‌കര്‍. രോഹിത് മോശം ഫോം തുടരുകയാണെങ്കില്‍ ക്യാപ്റ്റന്‍സിയില്‍ നിന്നും സ്വയം മാറി നില്‍ക്കണമെന്നാണ് ഗവാസ്‌കര്‍ പറയുന്നത്.

വരും മത്സരങ്ങളില്‍ സ്‌കോര്‍ ചെയ്യാന്‍ സാധിക്കുന്നില്ലെങ്കില്‍ സെലക്ഷന്‍ കമ്മിറ്റിയുടെ നിര്‍ദേശത്തിന് കാത്തുനില്‍ക്കാതെ രോഹിത് തന്നെ ഈ തീരുമാനമെടുക്കുമെന്നും ഗവാസ്‌കര്‍ പറയുന്നു.

എ.ബി.സി സ്‌പോര്‍ട്‌സിന് നല്‍കിയ അഭിമുഖത്തില്‍ സംസാരിക്കുകയായിരുന്നു ലിറ്റില്‍ മാസ്റ്റര്‍.

‘അടുത്ത കുറച്ച് മത്സരങ്ങളിലും രോഹിത് ശര്‍മയ്ക്ക് കളിക്കാന്‍ അവസരം ലഭിച്ചേക്കും എന്ന കാര്യം ഉറപ്പാണ്. എന്നാല്‍ ഇതിലും അദ്ദേഹത്തിന് റണ്‍സ് കണ്ടെത്താന്‍ സാധിക്കുന്നില്ലെങ്കില്‍, അദ്ദേഹം സ്വയം നിര്‍ണായകമായ ആ തീരുമാനമെടുക്കണമെന്നാണ് എനിക്ക് തോന്നുന്നത്.

അദ്ദേഹം സത്യസന്ധനായ ഒരു താരമാണ്. ടീമിന് ഭാരമാകാന്‍ അദ്ദേഹം ആഗ്രഹിക്കുന്നില്ല. ഇന്ത്യന്‍ ക്രിക്കറ്റിന് ഒരുപാട് കരുതല്‍ നല്‍കുന്ന ക്രിക്കറ്ററാണ് രോഹിത്. ഇക്കാരണം കൊണ്ടുതന്നെ അടുത്ത രണ്ട് മത്സരത്തിലും റണ്‍സ് കണ്ടെത്താന്‍ സാധിക്കുന്നില്ലെങ്കില്‍ അദ്ദേഹം സ്വയം സ്ഥാനമൊഴിയുമെന്ന് ഞാന്‍ കരുതുന്നു,’ സുനില്‍ ഗവാസ്‌കര്‍ പറഞ്ഞു.

റെഡ് ബോള്‍ ഫോര്‍മാറ്റില്‍ രോഹിത് റണ്‍സ് കണ്ടെത്താന്‍ പാടുപെടുന്നതാണ് സമീപകാലത്തെ പ്രധാന കാഴ്ച. കരിയറിലെ തന്നെ മോശം ഫോമിലാണ് അദ്ദേഹമിപ്പോള്‍. ഒടുവില്‍ കളിച്ച 13 ഇന്നിങ്‌സില്‍ നിന്നും 11.83 ശരാശരിയില്‍ 152 റണ്‍സ് മാത്രമാണ് അദ്ദേഹത്തിന് നേടാന്‍ സാധിച്ചത്.

ഇന്ത്യയില്‍ പര്യടനത്തിനെത്തിയ ന്യൂസിലാന്‍ഡിനോട് സമ്പൂര്‍ണ പരാജയം ഏറ്റുവാങ്ങേണ്ടി വന്നതും അദ്ദേഹത്തിന്റെ കരിയറിലെ തീരാ കളങ്കമായി.

നിലവില്‍ നടന്നുകൊണ്ടിരിക്കുന്ന പരമ്പരയിലും കാര്യങ്ങള്‍ വ്യത്യസ്തമല്ല. ബാറ്റ് ചെയ്ത മൂന്ന് ഇന്നിങ്‌സില്‍ നിന്നും ഏഴില്‍ താഴെ ശരാശരിയില്‍ 19 റണ്‍സ് മാത്രമാണ് രോഹിത്തിന് കണ്ടെത്താന്‍ സാധിച്ചത്. ക്യാപ്റ്റന്‍സിയിലും പലപ്പോഴായി അദ്ദേഹത്തിന് വിമര്‍ശനങ്ങളേല്‍ക്കേണ്ടി വന്നു.

രോഹിത്തിന്റെ ക്യാപ്റ്റന്‍സിയിലിറങ്ങിയ ഇന്ത്യ അഡ്‌ലെയ്ഡില്‍ പരാജയപ്പെടുകയും ബ്രിസ്‌ബെയ്‌നില്‍ സമനില വഴങ്ങുകയും ചെയ്തു. രോഹിത്തിന്റെ അഭാവത്തില്‍, ജസ്പ്രീത് ബുംറയുടെ നേതൃത്വത്തിലാണ് ഇന്ത്യ പെര്‍ത്തില്‍ 295 റണ്‍സിന്റെ ചരിത്ര വിജയം സ്വന്തമാക്കിയത്.

Content Highlight: Sunil Gavaskar says Rohit Sharma will himself step down if he fails to score in remaining matches of BGT