ഇന്ത്യന്‍ ഫുട്‌ബോളിലെ സൂപ്പര്‍താരം സുനില്‍ ഛേത്രിയുടെ വിരമിക്കല്‍ വാര്‍ത്ത സോഷ്യല്‍ മീഡിയയില്‍ വലിയ ചര്‍ച്ചയാവുകയാണിപ്പോള്‍. വിഷയത്തില്‍ പ്രതികരണവുമായി എത്തിയിരിക്കുകയാണ് ഛേത്രി. സാഫ് കപ്പ് ഫുട്ബോള് സെമി ഫൈനലില്‍ ലെബനന് എതിരായ മത്സരത്തിന് മുമ്പാണ് താരം വിഷയത്തില്‍ തന്റെ പ്രതികരണമറിയിച്ചത്.
‘ഇന്ത്യക്ക് വേണ്ടി കളിക്കുന്ന എന്റെ അവസാന മത്സരത്തെ കുറിച്ച് ഒരു ഊഹവും ഇല്ല. ദീര്‍ഘനാളത്തേക്ക് കളത്തില്‍ തുടരാനാകുമെന്ന പ്രതീക്ഷയുമില്ല. ഇപ്പോള്‍ മുന്നിലുള്ള കാര്യത്തെ കുറിച്ച് മാത്രമാണ് ഞാന്‍ ചിന്തിക്കുന്നത്. അടുത്ത് നടക്കാനിരിക്കുന്ന മത്സരങ്ങള്‍, പരിശീലന സെഷന്‍ എന്നിങ്ങനെയുള്ള ചിന്തകളേ ഇപ്പോള്‍ എന്റെ മനസിലുള്ളൂ.
എനിക്ക് പല കാര്യങ്ങള്‍ താരതമ്യം ചെയ്യാനും പഠിക്കാനുമുണ്ട്. ടീമിനായി എന്റെ സംഭാവന എന്താണ്, എനിക്ക് ഉദാന്ത സിങ്ങിനൊപ്പം ഓടി എത്താന്‍ സാധിക്കുന്നുണ്ടോ, എനിക്ക് സന്തേശ് ജിങ്കന്റെ ഒപ്പം ഹെഡ് ചെയ്യാന്‍ സാധിക്കുന്നുണ്ടോ, തുടങ്ങിയവയാണ് എന്റെ മനസിലുള്ള കാര്യങ്ങള്‍. അതിനൊക്കെ കഴിയാതെ വരുന്ന നിമിഷം ഇന്ത്യക്ക് വേണ്ടിയുള്ള എന്റെ പോരാട്ടം അവസാനിക്കും. എനിക്ക് ഫുട്ബോള് മറ്റെന്തിനേക്കാളും ഇഷ്ടമാണ്. പ്രശസ്തിയും പണവും ഞാന്‍ നോക്കാറില്ല,’ സുനില്‍ ഛേത്രി പറഞ്ഞു.
അതേസമയം, സാഫ് കപ്പ് ഫുട്ബോള് ഫൈനലില്‍ ഇന്ത്യ ചൊവ്വാഴ്ച കുവൈത്തിനെ നേരിടും. ഒമ്പതാം കിരീടം ലക്ഷ്യമിട്ടാണ് സുനില്‍ ഛേത്രിയും സംഘവും കലാശപ്പോരാട്ടത്തിനിറങ്ങുക. ബെംഗളൂരുവിലെ ശ്രീ കണ്ഠീരവ സ്റ്റേഡിയത്തില്‍ വൈകീട്ട് 7.30നാണ് മത്സരം.
മൂന്ന് പതിറ്റാണ്ട് നീണ്ട സാഫ് കപ്പ് ഫുട്ബോള് ചരിത്രത്തിലെ കിരീട ഫേവറിറ്റുകളാണ് ഇന്ത്യ. 13 ഫൈനലുകളില്‍ 12ലും മാറ്റുരച്ച ടീം ഇന്ത്യ എട്ട് തവണ കിരീടം ചൂടുകയും നാല് തവണ റണ്ണറപ്പാവുകയും ചെയ്തു.
ഷൂട്ടൗട്ടിലെ നീണ്ട സെമി ഫൈനല്‍ പോരാട്ടത്തില്‍ ലെബനനെ കീഴടക്കിയാണ് ഇന്ത്യ ഫൈനല്‍ ബെര്‍ത്ത് ഉറപ്പിച്ചത്. ടൂര്‍ണമെന്റില്‍ ഇന്ത്യ നേടിയ ഏഴ് ഗോളുകളില്‍ അഞ്ചെണ്ണം ഛേത്രിയുടേതായിരുന്നു. 38കാരനായ താരത്തില്‍ തന്നെയാണ് ഇന്ത്യയുടെ പ്രതീക്ഷ. ഉദാന്ത സിങ്, മഹേഷ് സിങ്. സഹല്‍ അബ്ദുല്‍ സമദ് എന്നിവരിലും ടീം പ്രതീക്ഷയര്‍പ്പിക്കുന്നുണ്ട്.
Content Highlights: Sunil Chhethri talking about his retirement plans