കോഴിക്കോട്: ജില്ലയുടെ ഓണോത്സവത്തിന്റെ ഭാഗമായി സെപ്റ്റംബര്‍ 10ന് ജില്ലയിലെ വിവിധ വേദികളില്‍ കലാ, കായിക, സംഗീത, നാടക പരിപാടികള്‍ അരങ്ങേറുമെന്ന് ജില്ലാ കളക്ടര്‍ ഡോ. നരസിംഹുഗരി ടി.എല്‍. റെഡ്ഡി അറിയിച്ചു.
പ്രധാന വേദിയായ കോഴിക്കോട് ബീച്ച് ഫ്രീഡം സ്‌ക്വയറില്‍ വൈകിട്ട് 6.30ന് ശ്രീകാന്തും അശ്വതിയും ചേര്‍ന്നൊരുക്കുന്ന ക്ലാസിക്കല്‍ ഡാന്‍സും, 7.30 ന് നാദിര്‍ഷയും സംഘവും ഒരുക്കുന്ന മ്യൂസിക്- ഡാന്‍സ്- കോമഡി ഷോ എന്നിവയുണ്ടാവും. മാനാഞ്ചിറയിലെ വേദിയില്‍ 6.30 മുതല്‍ ഇപ്റ്റ് നാട്ടുതുടി കൃഷ്ണദാസ് വല്ലപ്പണി അവതരിപ്പിക്കുന്ന നാടന്‍ പാട്ട്, കൊടുവള്ളി അനുഷ്ഠാന കലാകേന്ദ്രം കെ.കെ. ഗോപാലന്‍കുട്ടിയും സംഘവും അവതരിപ്പിക്കുന്ന പഞ്ചുരുളി തെയ്യം, ചാമുണ്ടി തെയ്യം, ചെണ്ടമേളം എന്നിവയും നടക്കും. ടൗണ്‍ഹാളില്‍ ഏഴ് മണിക്ക് ‘മക്കള്‍ക്ക്’ എന്ന നാടകം അരങ്ങേറുമെന്നും ജില്ലാ കളക്ടര്‍ പറഞ്ഞു.
