കോഴിക്കോട്: നിപ വൈറസ് ബാധയെ പറ്റി ആഷിഖ് അബു സംവിധാനം ചെയ്യുന്ന “വൈറസ്” സിനിമയുടെ റിലീസിന് സ്റ്റേ. ചിത്രത്തിന്റെ പേരും കഥയും മോഷ്ടിച്ചതാണെന്ന് ആരോപിച്ച് സംവിധായകന്‍ ഉദയ് അനന്തന്‍ നല്‍കിയ ഹരജിയിലാണ് നടപടി. വൈറസ് എന്ന പേരില്‍ താന്‍ ഒരു നാടകം നിര്‍മ്മിച്ചിരുന്നതായും അതാണ് ആഷിഖ് അബു സിനിമയാക്കിയതെന്നുമാണ് ഹരജിക്കാരന്റെ ആരോപണം.
എറണാകുളം ജില്ലാ കോടതിയാണ് സ്റ്റേ ചെയ്തത്. ഇതര ഭാഷയിലേക്കുള്ള ചിത്രത്തിന്റെ മൊഴിമാറ്റവും സ്റ്റേ ചെയ്തിട്ടുണ്ട്.
ഏപ്രില്‍ 11ന് ചിത്രം തീയേറ്ററുകളിലെത്തുമെന്നായിരുന്നു പ്രഖ്യാപനം. ജനുവരി മുതലാണ് സിനിമയുടെ ചിത്രീകരണം കോഴിക്കോട് ആരംഭിച്ചത്.
മുഹ്‌സിന്‍ പെരാരി, സുഹാസ്, ഷറഫു എന്നിവര്‍ ചേര്‍ന്നാണ് ചിത്രത്തിന് തിരക്കഥയൊരുക്കിയത്. രാജീവ് രവിയാണ് ചിത്രത്തിന്റെ ക്യാമറ ചെയ്യുന്നത്.