തിരുവനന്തപുരം: 56 ാമത് സംസ്ഥാന സ്‌കൂള്‍ കായികമേളയില്‍ പാലക്കാട് ജേതാക്കള്‍. 272 പോയിന്റ് നേടിയാണ് പാലക്കാട് ഓവറോള്‍ കിരീടം സ്വന്തമാക്കിയത്.257 പോയിന്റുമായി എറണാകുളമാണ് രണ്ടാം സ്ഥാനത്തുള്ളത്.[]
എട്ടുവര്‍ഷമായി എറണാകുളം കൈയ്യടക്കി വെച്ചിരുന്ന കിരീടമാണ് ഇത്തവണ പാലക്കാട് സ്വന്തമാക്കിയിരിക്കുന്നത്. അവസാനം വരെ ആരാവും ഓവറോള്‍ ചാമ്പ്യന്‍ എന്ന അനിശ്ചിതത്വത്തിന് ഉത്തരം ലഭിച്ചത് അവസാനത്തെ റിലേ മത്സരത്തോടെയാണ്.
പറളി സ്‌കൂളിന്റെ ബലത്തിലാണ് പാലക്കാട് കിരീടം സ്വന്തമാക്കിയത്. 71 പോയിന്റുമായി പറളി സ്‌കൂളും 48 പോയിന്റുമായി മുണ്ടൂര്‍ സ്‌കൂളും പാലക്കാടന്‍ കുതിപ്പായി മാറി.
ആദ്യമായാണ് സംസ്ഥാന സ്‌കൂള്‍ കായികമേള പാലക്കാട് സ്വന്തമാക്കുന്നത്. പ്രായ പരിശോധനയില്‍ മൂന്ന് താരങ്ങള്‍ പരാജയപ്പെട്ടതാണ് എറണാകുളത്തിന്റെ കിരീട നേട്ടത്തിന് തിരിച്ചടിയായത്.
കോതമംഗലം സെന്റ് ജോര്‍ജ് കോളേജ് ചാമ്പ്യന്‍ സ്‌കൂളായി തിരഞ്ഞെടുക്കപ്പെട്ടു.
56ാമത് സംസ്ഥാന സ്‌കൂള്‍ കായികമേളക്ക് തിരുവനന്തപുരം യൂനിവേഴ്‌സിറ്റി സ്‌റ്റേഡിയവും സെന്‍ട്രല്‍ സ്‌റ്റേഡിയവുമാണ് ചൊവ്വാഴ്ച മുതല്‍ നാല് ദിവസമാണ് നടന്നത്. സംസ്ഥാനത്തെ 14 ജില്ലകളില്‍നിന്നുമായി 2700 ഓളം താരങ്ങളാണ് കായിക മേളയില്‍ മാറ്റുരച്ചത്.