ആ പാട്ട് ചിത്രീകരിച്ചത് ഉക്രൈനിലായിരുന്നു; ഇപ്പോള്‍ അവിടത്തെ ജനങ്ങളെക്കുറിച്ചോര്‍ത്ത് ആശങ്കയുണ്ട്: രാജമൗലി
എന്റര്‍ടെയിന്‍മെന്റ് ഡെസ്‌ക്
Wednesday, 16th March 2022, 4:41 pm
ബ്രഹ്മാണ്ഡ സിനിമയായ ബാഹുബലിക്ക് ശേഷം സൂപ്പര്‍ഹിറ്റ് സംവിധായകന്‍ എസ്.എസ്. രാജമൗലി അണിയിച്ചൊരുക്കുന്ന ആര്‍.ആര്‍.ആര്‍ റിലീസിന് തയാറെടുത്തിരിക്കുകയാണ്.
ജൂനിയര്‍ എന്‍.ടി.ആര്‍, രാംചരണ്‍ തേജ, ആലിയ ഭട്ട്, അജയ് ദേവ്ഗണ്‍ എന്നിവര്‍ പ്രധാനകഥാപാത്രങ്ങളാകുന്ന ചിത്രം ഇന്ത്യന്‍ ഭാഷകള്‍ക്ക് പുറമേ ഇംഗ്ലീഷ്, കൊറിയന്‍, ടര്‍ക്കിഷ്, സ്പാനിഷ് ഭാഷകളിലായി മാര്‍ച്ച് 25നാണ് തിയേറ്ററുകളിലെത്തുന്നത്.
ചിത്രത്തിലെ നേരത്തെ റിലീസ് ചെയ്ത ‘നാട്ടു നാട്ടു’ എന്ന ഗാനവും ഏറെ ശ്രദ്ധ നേടിയതായിരുന്നു. ഈ ഗാനം ചിത്രീകരിച്ചത് ഉക്രൈനിലായിരുന്നെന്നും അവിടത്തെ ജനങ്ങളുടെ ഇപ്പോഴത്തെ സാഹചര്യത്തില്‍ ആശങ്കയുണ്ടെന്നും പറയുകയാണ് ഇപ്പോള്‍ സംവിധായകന്‍ രാജമൗലി.
റഷ്യ- ഉക്രൈന്‍ യുദ്ധം 21 ദിവസം പിന്നിട്ടിരിക്കുകയും ആക്രമണങ്ങള്‍ തുടരുകയും ചെയ്യുന്ന പശ്ചാത്തലത്തില്‍ കൂടിയാണ് രാജമൗലിയുടെ പ്രതികരണം.
