ആ രാജ്യത്തിലേക്ക് ഇനിയില്ല; കോമണ്‍വെല്‍ത്ത് ഗെയിംസില്‍ നിന്നും മുങ്ങി ശ്രീലങ്കന്‍ താരങ്ങള്‍
സ്പോര്‍ട്സ് ഡെസ്‌ക്
Monday, 8th August 2022, 10:42 pm
ബര്‍മിങ്ഹാമില്‍ നടക്കുന്ന കോമണ്‍വെല്‍ത്ത് ഗെയിംസില്‍ നിന്നും ശ്രീലങ്കിന്‍ താരങ്ങളെ കാണാനില്ല. ഒമ്പത് അത്‌ലറ്റുകളും ഒരു മാനേജറും മത്സരങ്ങള്‍ക്ക് ശേഷം മുങ്ങിയതായാണ് റിപ്പോര്‍ട്ടുകള്‍. ഇവര്‍ യു.കെയില്‍ ഒളിച്ചു താമസിക്കുകയാണെന്നാണ് രാജ്യാന്തര മാധ്യമങ്ങളിലെ റിപ്പോര്‍ട്ടുകള്‍ പറയുന്നത്.
ജൂഡോ താരം ചമില ദിലാനി, മനേജര്‍ അസേല ഡിസില്‍വ, ഗുസ്തി താരം ഷാനിത് ചതുരംഗ എന്നിവരെ കഴിഞ്ഞ ആഴ്ച മുതലാണ് കാണാതായത്. ഇതേ തുടര്‍ന്ന് ശ്രീലങ്കന്‍ ഉദ്യോഗസ്ഥര്‍ പൊലീസില്‍ പരാതിപ്പെടുകയായിരുന്നു.
ഇതിന് പിന്നാലെ ഏഴ് ലങ്കന്‍ താരങ്ങളെ കൂടെ കാണാതാകുകയായിരുന്നു. സ്വന്തം രാജ്യത്തെ ജീവിത സാഹചര്യങ്ങളെ തുടര്‍ന്നാണ് ഈ തീരുമാനത്തില്‍ താരങ്ങളെത്തിയതെന്നാണ് സൂചന.
