ലോകകപ്പില്‍ ഇന്ത്യ- ന്യൂസിലാന്‍ഡ് സൂപ്പര്‍ പോരാട്ടം നടന്നുകൊണ്ടിരിക്കുകയാണ്. ടോസ് നേടിയ ഇന്ത്യ കിവീസിനെ ബാറ്റിങ്ങിനയക്കുകയായിരുന്നു. 50 ഓവര്‍ പൂര്‍ത്തിയാകുമ്പേള്‍ കിവീസ് 273 എന്ന ഭേദപ്പെട്ട റണ്‍സിന് ഓള്‍ ഔട്ടായി.
സിറാജ് എറിഞ്ഞ പന്തില്‍ ഓപ്പണിങ് സ്റ്റാര്‍ ബാറ്റര്‍ ഡെവോണ്‍ കോണ്‍വെ ഒമ്പത് പന്തില്‍ പൂജ്യത്തിന് കൂടാരം കയറി കിവീസിന് മോശം തുടക്കം നല്‍കുകയായിരുന്നു.
തുടര്‍ന്ന് ബാറ്റിങ്ങിനിറങ്ങിയ രചിന്‍ രവീന്ദ്ര 75 (87) റണ്‍സും ഡാരില്‍ മിച്ചല്‍ 130 (127) റണ്‍സും നേടി തകര്‍പ്പന്‍ പ്രകടനം കാഴ്ചവെച്ചപ്പോഴാണ് കിവീസ് കുറഞ്ഞ സ്‌കോറില്‍ നിന്ന് കരകയറിയത്.
അഞ്ച് സിക്സറുകളും ഒമ്പത് ബൗണ്ടറികളുമടക്കമാണ് മിച്ചല്‍ തന്റെ സെഞ്ച്വറി കണ്ടെത്തിയത്. എന്നാല്‍ മുഹമ്മദ് ഷമി നേടിയ അഞ്ച് വിക്കറ്റിന്റെ മികവിലാണ് ഇന്ത്യ കിവീസിനെ 273 എന്ന സ്‌കോറില്‍ തളച്ചത്.
പക്ഷെ മത്സരത്തില്‍ രസകരമായത് നാലാം ഓവറില്‍ സിറാജ് എറിഞ്ഞ പന്തില്‍ ശ്രേയസ് അയ്യര്‍ അവിശ്വസനീയമായ ക്യാച്ച് എടുത്ത് കോണ്‍വെയെ പുറത്താക്കിയതായിരുന്നു.
സിറാജ് കോണ്‍വെയുടെ പാഡിലേക്ക് എറിഞ്ഞ പന്ത് കളിക്കാന്‍ ശ്രമിച്ചതോടെ അയ്യര്‍ അത്ഭുതകരമായി പന്ത് കയ്യിലൊതുക്കുകയായിരുന്നു. ശേഷം മികച്ച ഫീല്‍ഡിങ്ങിനുള്ള മെഡല്‍ തനിക്ക് അവശപ്പെടുന്നെന്ന രീതിയിലായിരുന്നു താരത്തിന്റെ ആഘോഷപ്രകടനം.
View this post on Instagram
നേരത്തെ ബംഗ്ലാദേശിനെതിരായ മത്സരത്തില്‍ ബുംറ എറിഞ്ഞ ഒരു സ്ലോ ഡെലിവറി കളിച്ച മുഷ്ഫിഖര്‍ റഹീമിനെ ഇന്ത്യന്‍ സൂപ്പര്‍മാന്‍ എന്ന വിശേഷണമുള്ള ജഡേജ അത്ഭുതകരമായ ക്യാച്ചിലൂടെ പുറത്താക്കിയിരുന്നു.
അപ്പോള്‍ താരം നടത്തിയ ആഘോഷപ്രകടനത്തിന് സമാനമാണ് ഇപ്പോള്‍ ശ്രേയസും തങ്ങളുടെ ഫീല്‍ഡിങ് കോച്ചിനെയും നോക്കി നടത്തിയത്. താനും ജഡേജയെപ്പോലെ മികച്ച ഫീല്‍ഡിങ്ങിനുള്ള മെഡലിന് അര്‍ഹനാണെന്ന് രസകരമായാണ് താരം അറിയിച്ചത്.
നിലവില്‍ രാഹുല്‍ ദ്രാവിഡിന്റെ നേതൃത്വത്തിലാണ് ഇന്ത്യയുടെ ഫീല്‍ഡിങ് കോച്ചിങ്. മുമ്പ് വിരാട് കോഹ്‌ലി, ഷര്‍ദുല്‍ താക്കൂര്‍, കെ.എല്‍. രാഹുല്‍, രവീന്ദ്ര ജഡേജ എന്നിവര്‍ക്ക് മികച്ച ഫീല്‍ഡിങ്ങിനുള്ള മെഡല്‍ നല്‍കിയിരുന്നു. ഇപ്പോള്‍ കിവീസിനെതിരായ കളിയില്‍ ശ്രേയസും മികച്ച ഫീല്‍ഡിങ് മെഡലിനുള്ള സാധ്യത ഉയര്‍ത്തിയിരിക്കുകയാണ്.
Content Highlight: Sreyas Iyer’s wicket celebration goes viral