ഞാന്‍ ക്യാരക്റ്റര്‍ റോള്‍ കൊടുത്ത് വളര്‍ത്തിയ മമ്മൂട്ടിയും മോഹന്‍ലാലും ഇന്ന് കോടീശ്വരന്‍മാരാണ്; വലിയവരായപ്പോള്‍ തനിക്കവര്‍ കാള്‍ഷീറ്റ് നല്‍കിയില്ലെന്ന് ശ്രീകുമാരന്‍ തമ്പി
എന്റര്‍ടെയിന്‍മെന്റ് ഡെസ്‌ക്
Wednesday, 30th December 2020, 12:43 pm
തന്റെ സിനിമാ അനുഭവങ്ങളെയും ജീവിതത്തെയും കുറിച്ച് തുറന്നു പറയുകയാണ് ഗൃഹലക്ഷ്മിക്ക് നല്‍കിയ അഭിമുഖത്തില്‍ ഗാനരചയിതാവും സംവിധായകനുമായ ശ്രീകുമാരന്‍ തമ്പി. സിനിമയുടെ ആര്‍ഭാടം തന്നെ ബാധിച്ചിട്ടില്ലെന്നും 20ാമത്തെ വയസ്സില്‍ കവിതയെഴുതിത്തുടങ്ങിയ താന്‍ എവിടെ നില്‍ക്കുന്നോ അവിടെത്തന്നെയാണ് ഇപ്പോഴുമുള്ളതെന്നും ശ്രീകുമാരന്‍ തമ്പി പറഞ്ഞു.
താന്‍ ക്യാരക്റ്റര്‍ റോള്‍ കൊടുത്ത് വളര്‍ത്തിയ മമ്മൂട്ടിയും മോഹന്‍ലാലും ഇന്ന് കോടീശ്വരന്‍മാരാണെന്നും എന്നാല്‍ പിന്നീട് അവര്‍ വലിയ താരങ്ങളായപ്പോള്‍ തനിക്ക് കാള്‍ഷീറ്റ് നല്‍കിയില്ലെന്നും ശ്രീകുമാരന്‍ തമ്പി പറയുന്നു. സിനിമയില്‍ വന്ന് 35ാമത്തെ വയസ്സില്‍ തന്നെ തനിക്ക് മൂന്നു കാറുണ്ടായിരുന്നുവെന്നും പിന്നീട് അതെല്ലാം വില്‍ക്കുകയായിരുന്നുവെന്നും അദ്ദേഹം പറഞ്ഞു.
