'ഇതുവരെ വയലാര്‍ അവാര്‍ഡ് തരാതിരുന്നത് മനപ്പൂര്‍വം, 'അവന്‍ മലയാളത്തിലെ മുഴുവന്‍ അക്ഷരവും പഠിച്ചിട്ട് കൊടുക്കാ'മെന്നാണ് ഒരു മഹാകവി പറഞ്ഞത്'
എന്റര്‍ടെയിന്‍മെന്റ് ഡെസ്‌ക്
Sunday, 8th October 2023, 2:45 pm
തനിക്ക് ഇതുവരെ വയലാര്‍ അവാര്‍ഡ് തരാതിരുന്നത് മനപ്പൂര്‍വമാണെന്ന് ശ്രീകുമാരന്‍ തമ്പി. മൂന്നാലു പ്രാവിശ്യം അവാര്‍ഡ് നല്‍കാമെന്ന് തീരുമാനിച്ചിട്ട് മാറ്റിവെച്ചിട്ടുണ്ടെന്നും ഇത് തുറന്ന് പറയാന്‍ മടിയില്ലെന്നും ശ്രീകുമാരന്‍ തമ്പി പറഞ്ഞു. ജീവിതം ഒരപു പെന്‍ഡുലം എന്ന ആത്മകഥക്ക് വയലാര്‍ അവാര്‍ഡ് ലഭിച്ചതിന് പിന്നാലെ ആലപ്പുഴയില്‍ മാധ്യമങ്ങളോട് സംസാരിക്കുകയായിരുന്നു അദ്ദേഹം.
‘എ.ആര്‍. രാജരാജവര്‍മയുടെ പുരസ്‌കാരം ഞാന്‍ വാങ്ങിക്കുന്ന സമയത്ത് തന്നെ ഈ അവാര്‍ഡ് പ്രഖ്യാപിക്കുന്നത് അനുഗ്രഹമാണ്. 31ാമത്തെ വയസില്‍ എഞ്ചിനിയറുടെ വീണക്ക് സാഹിത്യ അക്കാദമി അവാര്‍ഡ് തീരുമാനിച്ചതാണ്. ഒരു മഹാകവിയാണ് പോയി വെട്ടിക്കളഞ്ഞത്. അവന്‍ മലയാളത്തിലെ മുഴുവന്‍ അക്ഷരവും പഠിച്ചിട്ട് കൊടുക്കാം എന്ന് പറഞ്ഞു. മുഴുവന്‍ അക്ഷരവും പഠിക്കാത്ത ഞാന്‍ അങ്ങേരെക്കാളും കൂടുതല്‍ പാട്ടുകള്‍ എഴുതി.
