നിരാഹാര സമരം അവസാനിപ്പിച്ച് വാങ്ചുക്; ലഡാക്ക് ചർച്ചകൾ ഡിസംബർ മൂന്നിന് പുനരാരംഭിക്കും

ലഡാക്ക്: ലഡാക്കിൻ്റെ ആവശ്യങ്ങളെക്കുറിച്ചുള്ള ചർച്ചകൾ ഡിസംബറിൽ പുനരാരംഭിക്കുമെന്ന് ആഭ്യന്തര മന്ത്രാലയം ഉറപ്പുനൽകിയതിനെത്തുടർന്ന് മറ്റുള്ളവരോടൊപ്പം നിരാഹാരം അവസാനിപ്പിച്ച് പരിസ്ഥിതി പ്രവർത്തകൻ സോനം വാങ്ചുക്.

ഒക്ടോബർ ആറ് മുതൽ ദൽഹി ലഡാക്ക് ഭവനിൽ അനിശ്ചിതകാല നിരാഹാര സമരം നടത്തുന്ന പ്രവർത്തകരെ ജമ്മു കശ്മീർ, ലഡാക്ക് ജോയിൻ്റ് സെക്രട്ടറി പ്രശാന്ത് ലോഖണ്ഡേ കാണുകയും അവർക്ക് ആഭ്യന്തര മന്ത്രാലയത്തിൽ നിന്നുള്ള കത്ത് നൽകുകയും ചെയ്തു.

ലഡാക്കിൽ നിന്നുള്ള പ്രതിനിധികളുമായി ചർച്ച നടത്തുന്ന മന്ത്രാലയത്തിൻ്റെ ഉന്നതാധികാര സമിതി ഡിസംബർ മൂന്നിന് അവരെ കാണുമെന്ന് കത്തിൽ പറയുന്നു. ഇതേത്തുടർന്നാണ് വാങ്ചുകും അനുയായികളും നിരാഹാരം അവസാനിപ്പിക്കാൻ തീരുമാനിക്കുകയും കുത്തിയിരിപ്പ് സമരം അവസാനിപ്പിക്കുകയും ചെയ്തത്.

തങ്ങളുടെ നിരാഹാര സമരത്തിന്റെ 16ാം ദിവസം പ്രധാന അപ്പീൽ പരിഹരിച്ചുവെന്ന് പറയുന്നതിൽ സന്തോഷമുണ്ടെന്ന് അദ്ദേഹം പറഞ്ഞു.

‘ഞങ്ങളുടെ നിരാഹാര സമരത്തിന്റെ 16ാം ദിവസം, ഞങ്ങളുടെ പ്രധാന ആവശ്യം പരിഹരിച്ചുവെന്ന് പറയുന്നതിൽ എനിക്ക് സന്തോഷമുണ്ട്. ഇപ്പോൾ, ആഭ്യന്തര മന്ത്രാലയം ജോയിൻ്റ് സെക്രട്ടറി, ലഡാക്ക് ഭവനിൽ വന്ന് ഈ കത്ത് എനിക്ക് കൈമാറി, അതിൽ ചർച്ചകൾ നടക്കുന്നുണ്ടെന്ന് പറയുന്നു. ലേയുടെ അപ്പെക്സ് ബോഡിക്കും കെ.ഡി.എയ്ക്കും (കാർഗിൽ ഡെമോക്രാറ്റിക് അലയൻസ്) കേന്ദ്ര സർക്കാരുമായുള്ള ചർച്ച ഡിസംബറോടെ ഉടൻ പുനരാരംഭിക്കും,’ അദ്ദേഹം പറഞ്ഞു.

ലഡാക്കിലെ രണ്ട് പ്രദേശങ്ങളിൽ നിന്നുള്ള രണ്ട് സാമൂഹിക-രാഷ്ട്രീയ സംഘടനകളായ മന്ത്രാലയവും ലേ അപ്പെക്സ് ബോഡിയും കാർഗിൽ ഡെമോക്രാറ്റിക് അലയൻസും തമ്മിലുള്ള ചർച്ചകളുടെ ഫലം പോസിറ്റീവ് ആയിരിക്കുമെന്ന് താൻ പ്രതീക്ഷിക്കുന്നതായി അദ്ദേഹം പറഞ്ഞു.

‘ചർച്ചകൾ ഈ സംഘടനകൾ നടത്തും, ലഡാക്കിന് മാത്രമല്ല, മുഴുവൻ രാജ്യത്തിനും വളരെ നല്ല ഫലങ്ങൾ വരുമെന്ന് ഞാൻ പ്രതീക്ഷിക്കുന്നു. ഈ കാരണത്താൽ ഇനിയൊരിക്കലും മറ്റൊരു അൻഷാൻ (നിരാഹാര സമരം ) ചെയ്യേണ്ടതില്ലെന്ന് ഞാൻ പ്രതീക്ഷിക്കുന്നു. ഈ അവസരത്തിൽ, ഈ ശ്രമത്തിൽ ഞങ്ങളെ പിന്തുണച്ച എല്ലാവർക്കും നന്ദി പറയുന്നു,’ അദ്ദേഹം കൂട്ടിച്ചേർത്തു.

ലഡാക്കിനെ ഭരണഘടനയുടെ ആറാം ഷെഡ്യൂളിൽ ഉൾപ്പെടുത്തണമെന്ന് ആവശ്യപ്പെട്ടാണ് വാങ്ചുക് സമരം ആരംഭിച്ചത്. ഇതിനായി തൻ്റെ അനുയായികൾക്കൊപ്പം ലേയിൽ നിന്ന് ഡൽഹിയിലേക്ക് അദ്ദേഹം മാർച്ച് നടത്തിയിരുന്നു. ഒരു മാസത്തെ കാൽനടയാത്രയ്‌ക്ക് ശേഷം സെപ്റ്റംബർ 30 ന് അവർ ദേശീയ തലസ്ഥാനത്ത് എത്തിയെങ്കിലും തലസ്ഥാനത്തെ സിംഗു ബോർഡർ പോയിൻ്റിൽ വച്ച് ദൽഹി പൊലീസ് അവരെ കസ്റ്റഡിയിലെടുത്തു. തുടർന്ന് ഒക്ടോബർ രണ്ടിന് രാത്രി വിട്ടയച്ചു.

ഭരണഘടനയുടെ ആറാം ഷെഡ്യൂളിൽ ലഡാക്കിനെ ഉൾപ്പെടുത്താൻ സമ്മർദ്ദം ചെലുത്താനും വിഷയം ഉന്നയിക്കാൻ സർക്കാരിൻ്റെ ഉന്നത നേതൃത്വത്തെ കാണാനും ആവശ്യപ്പെട്ട് ഒക്ടോബർ ആറിന് വാങ്ചുക്ക് നിരാഹാരം ആരംഭിക്കുകയായിരുന്നു.

ഭരണഘടനയുടെ ആറാം ഷെഡ്യൂളിൽ വടക്കുകിഴക്കൻ സംസ്ഥാനങ്ങളിലെ അസം, മേഘാലയ, ത്രിപുര, മിസോറാം എന്നീ സംസ്ഥാനങ്ങളിലെ ആദിവാസി മേഖലകളുടെ ഭരണം സംബന്ധിച്ച വ്യവസ്ഥകൾ ഉൾപ്പെടുന്നു. ഈ മേഖലകളെ സ്വതന്ത്രമായി ഭരിക്കാൻ നിയമനിർമ്മാണ, ജുഡീഷ്യൽ, എക്സിക്യൂട്ടീവ്, സാമ്പത്തിക അധികാരങ്ങളുള്ള സ്വയംഭരണ കൗൺസിലുകൾ ഉണ്ട്.

സംസ്ഥാന പദവി, ലഡാക്കിന് പബ്ലിക് സർവീസ് കമ്മീഷൻ, ലേ, കാർഗിൽ ജില്ലകൾക്ക് പ്രത്യേക ലോക്‌സഭാ സീറ്റുകൾ എന്നിവയും പ്രതിഷേധക്കാർ ആവശ്യപ്പെടുന്നുണ്ട്.

കാർഗിൽ ഡെമോക്രാറ്റിക് അലയൻസുമായി ചേർന്ന് പ്രക്ഷോഭത്തിന് നേതൃത്വം നൽകുന്ന ലേ അപെക്സ് ബോഡിയാണ് ദൽഹിയിലേക്ക് മാർച്ച് സംഘടിപ്പിച്ചത്.

Content Highlight: Sonam Wangchuk breaks fast; MHA to resume Ladakh talks on 3 Dec