ന്യൂദല്‍ഹി: പ്രധാനമന്ത്രിയെ ആലിംഗനം ചെയ്യാന്‍ കഴിയുന്ന രാഹുലിന് ആദായ നികുതി വകുപ്പ് ഉദ്യോഗസ്ഥരെ പേടിയാണെന്ന പരിഹാസവുമായി കേന്ദ്രമന്ത്രി സ്മൃതി ഇറാനി.
രാഹുല്‍ ഗാന്ധിയുടേയും സോണിയ ഗാന്ധിയുടേയും നികുതി റിട്ടേണുകള്‍ പരിശോധിക്കണമെന്ന ദല്‍ഹി ഹൈക്കോടതിയുടെ ഉത്തരവിന് പിന്നാലെയാണ് സമൃതി ഇറാനിയുടെ പരാമര്‍ശം.
2011-2012 സാമ്പത്തിക വര്‍ഷത്തെ നികുതി റിട്ടേണുകള്‍ പരിശോധിക്കണമെന്നാണ് ദല്‍ഹി ഹൈക്കോടതിയുടെ ഉത്തരവ്. അതേസമയം, ഇന്‍കം ടാക്‌സ് നോട്ടീസിനെതിരെ ഇരുവരും ഹൈക്കോടതിയില്‍ ഹരജി സമര്‍പ്പിച്ചിട്ടുണ്ട്.
പ്രധാനമന്ത്രിയെ നൊടിയിടകൊണ്ട് ആലിംഗനം ചെയ്യുന്ന രാഹുല്‍, ആദായ നികുതി ഉദ്യോഗസ്ഥര്‍ എത്തുമ്പോഴേക്കും ഓടിയൊളിക്കുന്നുവെന്നാണ് സമൃതി ഇറാനിയുടെ പരിഹാസം.
രാജ്യത്ത് കിട്ടാക്കടം വര്‍ധിച്ചതിന് കാരണം കോണ്‍ഗ്രസാണെന്നും സ്മൃതി ഇറാനി ആരോപിച്ചു. രാജ്യം സാമ്പത്തിക ഉന്നതിയിലായിരുന്ന 2006-2008 കാലത്താണ് കിട്ടാക്കടം ഏറ്റവും അധികമുണ്ടായതെന്ന് മുന്‍ ആര്‍.ബി.ഐ ഗവര്‍ണര്‍ രഘുറാം രാജന്‍ ചൊവ്വാഴ്ച പറഞ്ഞിരുന്നു.
കിട്ടാക്കടത്തിന് കാരണം കോണ്‍ഗ്രസാണെന്ന് രഘുറാം രാജന്റെ പ്രസ്താവന വ്യക്തമാക്കുന്നുണ്ട്. നികുതിദായകരുടെ പണം സോണിയ ഗാന്ധിയും രാഹുല്‍ ഗാന്ധിയും പ്രിയങ്ക ഗാന്ധിയും ചേര്‍ന്ന് അട്ടിമറിക്കുകയായിരുന്നു എന്നും സ്മൃതി ഇറാനി ആരോപിച്ചു.