കിയാ സൂപ്പര്‍ ലീഗിലെ ആദ്യമത്സരത്തിനിറങ്ങിയ ഇന്ത്യന്‍ ഓപ്പണര്‍ സ്മൃതി മന്ദാനയ്ക്ക് മികച്ച തുടക്കം. നിലവിലെ ചാമ്പ്യന്‍മാരായ വെസ്റ്റേണ്‍ സ്‌റ്റോമിനായി 20 പന്തില്‍ 48 റണ്‍സാണ് മന്ദാന കുറിച്ചത്. മന്ദാനയുടെയും ഹെതര്‍ നൈറ്റിന്റെയും മികവില്‍ 7 വിക്കറ്റിന് യോര്‍ക്ക്‌ഷെയര്‍ ഡയമണ്ട്‌സിനെ, വെസ്റ്റേണ്‍ സ്‌റ്റോം തോല്‍പ്പിച്ചു.
ആദ്യം ബാറ്റ് ചെയ്ത ഡയമണ്ട്‌സ് 5 വിക്കറ്റിന് 162 റണ്‍സ് ലക്ഷ്യമാണ് വെസ്റ്റേണ്‍ സ്‌റ്റോമിന് മുന്നില്‍വെച്ചത്. മറുപടി ബാറ്റിംഗിനിറങ്ങിയ വെസ്റ്റേണിന് ആദ്യ പന്തില്‍ തന്നെ ഓപ്പണര്‍ റാഹേല്‍ പ്രീസ്റ്റിനെ നഷ്ടമായി. എന്നാല്‍ രണ്ടാം വിക്കറ്റില്‍ ഒത്തുചേര്‍ന്ന നൈറ്റും മന്ദാനയും വെസ്റ്റേണ്‍ ഇന്നിംഗ്‌സിനെ മുന്നോട്ട് നയിച്ചു.
62 പന്തില്‍ 97 റണ്‍സെടുത്ത നൈറ്റിനൊപ്പം മന്ദാനയും ആക്രമിച്ച് കളിച്ചപ്പോള്‍ ഡയമണ്ട്‌സിന്റെ ബൗളര്‍മാര്‍ വിയര്‍ത്തു. വെസ്റ്റേണിനായി 15 സിക്‌സുകളാണ് ബാറ്റ്‌സ്‌വുമണ്‍മാര്‍ നേടിയത്. ഇതില്‍ 10 സിക്‌സും മന്ദാന-നൈറ്റ് സഖ്യത്തിന്റെ വകയായിരുന്നു.
5 സിക്‌സും 3 ബൗണ്ടറിയും ഉള്‍പ്പെട്ടതായിരുന്നു മന്ദാനയുടെ ഇന്നിംഗ്‌സ്.
നേരത്തെ 55 റണ്‍സെടുത്ത കിമ്മിന്‍സിന്റെയും 41 റണ്‍സെടുത്ത വിന്‍ഫീല്‍ഡിന്റെയും മികവിലാണ് ഡയമണ്ട്‌സ് 162 എന്ന ടോട്ടല്‍ പടുത്തുയര്‍ത്തിയത്.
മറ്റൊരു ഇന്ത്യന്‍ താരം ഹര്‍മന്‍പ്രീത് കൗറും ലീഗില്‍ മത്സരിക്കുന്നുണ്ട്.
WATCH THIS VIDEO: