ലോകമെമ്പാടും ഒരുപാട് ആരാധകരുള്ള ക്രിക്കറ്റ് ലീഗാണ് ഐ.പി.എല്‍. കളി മികവ് കൊണ്ടും ആരാധക പിന്തുണകൊണ്ടും മറ്റുള്ള ലീഗുകളെക്കാള്‍ ഒരുപാട് മുന്നിലാണ് ഐ.പി.എല്‍.
ഇപ്പോഴിതാ ഐ.പി.എല്‍, ബി.ബി.എല്‍, ദി ഹണ്ട്രഡ് മോഡലില്‍ പുതിയ ലീഗ് ആരംഭിക്കാനുള്ള നീക്കത്തിലാണ് ദക്ഷിണാഫ്രിക്കന്‍ ക്രിക്കറ്റ്. പുതിയ റിപ്പോര്‍ട്ടുകള്‍ പ്രകാരം ദക്ഷിണാഫ്രിക്കന്‍ ലീഗിലേക്കുള്ള ആറ് ടീമുകളെ ഐ.പി.എല്‍ ടീമുടമകള്‍ സ്വന്തമാക്കിയെന്നാണ്.
ടീമുകള്‍ക്ക് വേണ്ടിയുള്ള ലേലം ജൂലൈ 13ആം തീയതി തന്നെ അവസാനിച്ചിരുന്നു. എന്നാല്‍ ആരൊക്കെയാണ് ലേലം വിളിയില്‍ വിജയിച്ചതെന്ന് പുറത്തുവിട്ടിട്ടില്ല. 29 ഫ്രഞ്ചൈസികള്‍ രജിസ്റ്റര്‍ ചെയ്തിരിക്കുന്ന ലേലത്തില്‍ ആറ് ടീമുകളെ ഐ.പി.എല്ലിന്റെ ടീമുടമകള്‍ സ്വന്തമാക്കിയിട്ടുണ്ട്.
അടുത്ത വര്‍ഷം ആരംഭിക്കുന്ന ടൂര്‍ണമെന്റില്‍ ഇന്ത്യയില്‍ നിന്ന് വമ്പന്‍ പേരുകളാണ് ഉള്‍പ്പെട്ടിരിക്കുന്നത്. മുംബൈ ഇന്ത്യന്‍സിന്റെ ഉടമയായ മുകേഷ് അംബാനി, ചെന്നൈ സൂപ്പര്‍ കിങ്‌സിന്റെ ഉടമയായ എന്‍ ശ്രീനിവാസന്‍, ദല്‍ഹി ക്യാപിറ്റല്‍സിന്റെ ഉടമയായ പാര്‍ത്ഥ ജിനദല്‍ എന്നിവരാണ് ടീമുകളെ സ്വന്തമാക്കിയ മൂന്ന് ഉടമകള്‍.
സണ്‍റൈസേഴ്‌സ് ഹൈദരാബാദിന്റെ ഉടമകളായ മാരന്‍ ഗ്രൂപ്പ്, ലഖ്‌നൗ സൂപ്പര്‍ ജയന്റ്‌സിന്റെ ടീമുടമയായ സഞ്ജീവ് ഗോയെങ്ക, രാജസ്ഥാന്‍ റോയല്‍സിന്റെ ടീമുടമയായ മനോജ് ബദാലെ എന്നിവരാണ് ടീമുകളെ സ്വന്തമാക്കിയ ഐ.പി.എല്‍ ഉടമകള്‍.
ഐ.പി.എല്‍ വിജയകരമാക്കാന്‍ ഈ ടീമുടമകളുടെ പങ്ക് വളരെ വലുതാണ്. മുംബൈ, ചെന്നൈ ടീമുകളാണ് ഐ.പി.എല്ലിലെ ഏറ്റവും വിജയകരമായ ടീമുകള്‍. അവരുടെ പ്രൊഫഷണലിസമാണ് അവരെ വിജയത്തിലേക്ക് നയിച്ചത്. പുതിയ ടീമുകള്‍ക്ക് മികച്ച പിന്തുണ നല്‍കാന്‍ തീര്‍ച്ചയായും ഐ.പി.എല്‍ വമ്പന്‍മാര്‍ക്ക് സാധിക്കും.
യു.എ.ഇ ബേസ് ചെയ്ത് സംഘടിപ്പിക്കുന്ന ലീഗില്‍ പല വമ്പന്‍ താരങ്ങളും പങ്കെടുക്കുമെന്നാണ് റിപ്പോര്‍ട്ടുകള്‍. ഇംഗ്ലണ്ട് നായകന്‍ ജോസ് ബട്ട്‌ലര്‍, ലയാം ലിവിങ്‌സ്റ്റണ്‍, ഡെയ്ന്‍ ബ്രാവോ എന്നിവര്‍ ലീഗില്‍ പങ്കെടുക്കാന്‍ കരാറായി എന്നാണ് റിപ്പോര്‍ട്ടുകള്‍.
Content Highlights: Six Ipl Franchise owned six new teams in New League of SA cricket