ചാനല്‍ റിയാലിറ്റി ഷോകളിലൂടെ സിനിമയുടെ വെള്ളിവെളിച്ചത്തിലേക്കെത്തിയ നടനാണ് ശിവകാര്‍ത്തികേയന്‍. എന്റര്‍ടൈനമെന്റ് സിനിമകളിലൂടെ തമിഴ് പ്രേക്ഷകരുടെ ഇഷ്ടം പിടിച്ചുപറ്റിയ ശിവകാര്‍ത്തികേയന്‍ വളരെ പെട്ടെന്ന് തമിഴ് സിനിമയുടെ മുന്‍നിരയിലേക്ക് നടന്നുകയറി. അഭിനയത്തിന് പുറമെ നിര്‍മാണത്തിലും ഗാനരചനയിലും ആലാപനത്തിലും തന്റെ കയ്യൊപ്പ് ചാര്‍ത്താന്‍ ശിവക്ക് സാധിച്ചു.
ഏറ്റവുമൊടുവില്‍ പുറത്തിറങ്ങിയ അമരനിലൂടെ ടൈര്‍ 2വിലെ ഏറ്റവും വലിയ താരമായി ശിവകാര്‍ത്തികേയന്‍ മാറി. അമരന് വേണ്ടി ശിവകാര്‍ത്തികേയന്‍ നടത്തിയ ബോഡി ട്രാന്‍സ്‌ഫോര്‍മേഷന്‍ വലിയ ചര്‍ച്ചയായിരുന്നു. ഒരു പട്ടാളക്കാരന് വേണ്ടി ഫിറ്റ് ആയ ബോഡിയിലേക്ക് ശിവ മാറുന്നതിന്റെ വീഡിയോ സോഷ്യല്‍ മീഡിയയില്‍ വൈറലായിരുന്നു.
അതേസമയത്ത് സിക്‌സ് പാക്ക് വെച്ചുള്ള ശിവയുടെ ഫോട്ടോ സോഷ്യല്‍ മീഡിയയില്‍ തരംഗമായിരുന്നു. എന്നാല്‍ ആ ഫോട്ടോ ഫേക്കാണെന്ന് പറയുകയാണ് ശിവകാര്‍ത്തികേയന്‍. താന്‍ അമരന് വേണ്ടി ബോഡി ഫിറ്റ് ആക്കുക മാത്രമാണ് ചെയ്തതെന്ന് ശിവ പറഞ്ഞു. ആ സമയത്ത് താന്‍ എല്ലായിടത്തും തൊപ്പി വെച്ചാണ് പോകാറുള്ളതെന്നും ആ ഫോട്ടോയില്‍ തൊപ്പിയും കൂടി കണ്ടപ്പോള്‍ അത് ഒറിജിനലാണെന്ന് പലര്‍ക്കും തോന്നിയെന്നും ശിവ കൂട്ടിച്ചേര്‍ത്തു.
എന്നാല്‍ ആ സിക്‌സ് പാക്ക് ആരോ എഡിറ്റ് ചെയ്തതാണെന്നും ശിവകാര്‍ത്തികേയന്‍ പറഞ്ഞു. അത്രക്ക് പെര്‍ഫക്ട് ആയിട്ടാണ് ആ ഫോട്ടോ എഡിറ്റ് ചെയ്തതെന്നും അത് ചെയ്തവനെ താന്‍ തപ്പിനടക്കുകയാണെന്നും ശിവ പറഞ്ഞു. അമരന്റെ പ്രൊമോഷനുമായി ബന്ധപ്പെട്ട് വിജയ് ടി.വിക്ക് നല്‍കിയ അഭിമുഖത്തിലാണ് ശിവ ഇക്കാര്യം പറഞ്ഞത്.
‘അമരന് വേണ്ടി നന്നായി പണിയെടുത്തിട്ടുണ്ട്. മിലിട്ടറി ട്രെയിനിങ് ഒക്കെ നമ്മളെ പരമാവധി പിഴിഞ്ഞെടുക്കുന്ന തരത്തിലുള്ളതായിരുന്നു. ആ ക്യാരക്ടറിന് വേണ്ടി ബോഡി ഫിറ്റാക്കാനും നല്ല പാടായിരുന്നു. അതിന്റെ ഇടയില്‍ എന്റെ ബോഡി ട്രാന്‍സ്‌ഫോര്‍മേഷനെന്ന് പറഞ്ഞ് സിക്‌സ് പാക്ക് കാണിച്ചുനില്‍ക്കുന്ന ഫോട്ടോ വന്നിരുന്നു. അത് സത്യം പറഞ്ഞാല്‍ ഫേക്കാണ്. എനിക്ക് സിക്‌സ് പാക്കൊന്നും ഇല്ല. ബോഡി ഫിറ്റാക്കി എടുത്തു എന്ന് മാത്രമേയുള്ളൂ.
ആ സമയത്ത് ഞാന്‍ എല്ലാ പരിപാടിയിലും ക്യാപ് ധരിക്കുമായിരുന്നു. ആ ക്യാപ് ഫോട്ടോയിലും കണ്ടതോടെ പലരും അത് ഒറിജിനലാണെന്ന് തെറ്റിദ്ധരിച്ചു. പലരും ആ ഫോട്ടോ കണ്ട് എന്നെ വിളിച്ച് അഭിനന്ദിച്ചിരുന്നു. അവരുടെ വിചാരം അത് ഒറിജനിലാണെന്നാണ്. ആ ഫോട്ടോ എഡിറ്റ് ചെയ്തവനെ ഞാന്‍ തപ്പി നടക്കുകയാണ്. അവന് നല്ല കഴിവുണ്ട്,’ ശിവകാര്‍ത്തികേയന്‍ പറയുന്നു.
Content Highlight: Sivakarthikeyan about the viral photo during Amaran shooting