മലയാളികളില്‍ പോലും ഏറെ ആരാധകരുള്ള തമിഴ് നടിയും ഗായികയുമാണ് ശിവാംഗി കൃഷ്ണകുമാര്‍. 2019ല്‍ ശിവാംഗി സ്റ്റാര്‍ വിജയ്‌യില്‍ സംപ്രേഷണം ചെയ്ത തമിഴ് ഗാന മത്സരമായ സൂപ്പര്‍ സിംഗര്‍ 7ല്‍ പങ്കെടുത്തിരുന്നു.

എന്നാല്‍ 2020ലെ കുക്കു വിത്ത് കോമാളി എന്ന കോമഡി-പാചക പരിപാടിയിലൂടെയാണ് ശിവാംഗി കൂടുതല്‍ ശ്രദ്ധിക്കപ്പെടുന്നത്. ആ പരിപാടിയിലൂടെ മലയാളികള്‍ക്കിടയില്‍ പോലും ശിവാംഗിക്ക് ആരാധകരെ ലഭിച്ചു.

കലൈമാമണി അവാര്‍ഡ് ജേതാക്കളായ ബിന്നി കൃഷ്ണകുമാറിന്റെയും കെ. കൃഷ്ണകുമാറിന്റെയും മകളാണ് ശിവാംഗി. 2012ല്‍ പസംഗ എന്ന തമിഴ് ചിത്രത്തിലെ ‘അന്‍ബാലെ അഴകന വീട്’ എന്ന ഗാനത്തിലൂടെയാണ് ശിവാംഗി ഗായികയാകുന്നത്.

ഇപ്പോള്‍ തനിക്ക് ഏറെ ഇഷ്ടമുള്ള സിനിമയെ കുറിച്ച് പറയുകയാണ് ശിവാംഗി. നസ്രിയ – നിവിന്‍ പോളി കൂട്ടുകെട്ടില്‍ എത്തി വന്‍വിജയമായ ഓം ശാന്തി ഓശാനയെ കുറിച്ചാണ് ശിവാംഗി സംസാരിച്ചത്. ആ സിനിമ കണ്ടപ്പോഴാണ് തനിക്ക് പ്രേമിക്കാന്‍ ഒരു പ്രതീക്ഷ വന്നതെന്നാണ് നടി പറയുന്നത്. മൈല്‍ സ്റ്റോണ്‍ മേക്കേഴ്‌സിന് നല്‍കിയ അഭിമുഖത്തില്‍ സംസാരിക്കുകയായിരുന്നു ശിവാംഗി.

‘എന്റെ ഏറ്റവും പ്രിയപ്പെട്ട സിനിമയാണ് ഓം ശാന്തി ഓശാന. ആ സിനിമ കണ്ടപ്പോഴാണ് എനിക്ക് പ്രേമിക്കാന്‍ ഒരു പ്രതീക്ഷ വന്നത്. ചെറിയ കുട്ടിയായ നായികയും വലിയ ആളായ നായകനുമല്ലേ അതില്‍.

അതിലെ നസ്രിയ – നിവിന്‍ പോളി കോമ്പോ എനിക്ക് ഒരുപാട് ഇഷ്ടമാണ്. റോളര്‍ കോസ്റ്റര്‍ വഴിയുള്ള നിവിന്‍ പോളിയുടെ എന്‍ട്രി സൂപ്പറാണ്. അങ്ങനെയുള്ള ഒരാള്‍ എനിക്കും ഉണ്ടാകുമോയെന്ന് ഞാന്‍ ആഗ്രഹിച്ചിട്ടുണ്ട്,’ ശിവാംഗി കൃഷ്ണകുമാര്‍ പറയുന്നു.

Content Highlight: Sivaangi Krishnakumar Talks About Nivin Pauly’s Ohm Shanthi Oshaana Movie