കണ്ണൂര്‍: പ്രശസ്ത മാപ്പിളപ്പാട്ട് ഗായകന്‍ എരഞ്ഞോളി മൂസയ്ക്ക് നേരെ മണല്‍ മാഫിയയുടെ ആക്രമണം. ഞായറാഴ്ച വൈകീട്ടാണ് സംഭവം. തലശ്ശേരി കടല്‍പാലത്തിന് സമീപത്തെ അദ്ദേഹത്തിന്റെ വീടിനു പിറകില്‍ നിന്നുള്ള അനധികൃത മണലെടുപ്പ് ചോദ്യം ചെയ്തതിനെ തുടര്‍ന്നാണ് അദ്ദേഹത്തെ മാഫിയ സംഘം ആക്രമിച്ചത്.
ആക്രമണത്തില്‍ അദ്ദേഹത്തിന്റെ ഇരു കൈകള്‍ക്കും ഗുരുതരമായി പരിക്കേറ്റിട്ടുണ്ട്. ഓട്ടോയിലാണ് സംഘം മണല്‍ കടത്താന്‍ ശ്രമിച്ചത്. സംഘത്തിലുണ്ടായിരുന്ന കണ്ണന്‍ അക്ബര്‍എന്നയാള്‍ മരക്കഷ്ണം കൊണ്ട് തലക്കടിക്കാന്‍ ശ്രമിച്ചപ്പോള്‍ തടുത്തപ്പോഴാണ് കൈകള്‍ക്ക് പരിക്കേറ്റത്.
പരിക്കേറ്റ മൂസയെ മകളുടെ ഭര്‍ത്താവ് ഉസ്മാന്‍ എത്തി കണ്ണൂര്‍ ജനറല്‍ ആശുപത്രിയില്‍ പ്രവേശിപ്പിക്കുകയായിരുന്നു. നേരത്തെ മണല്‍ മാഫിയ സംഘം മൂസയുടെ മകളുടെ വീട് ആക്രമിക്കുകയും ഉസ്മാനെ പരിക്കേല്‍പ്പിക്കുകയും ചെയ്തിരുന്നു.
ആക്രമണവുമായി ബന്ധപ്പെട്ട് കണ്ണന്‍ അക്ബര്‍, സഹോദരന്‍ മടക്കി നസീര്‍ മറ്റു നാലു പേര്‍ക്കുമെതിരെയും പോലീസ് കേസെടുത്തിട്ടുണ്ട്.