തിരുവനന്തപുരം: കഴക്കൂട്ടം ടെക്‌നോപാര്‍ക്കിന് സമീപം ഹോട്ടലില്‍ അക്രമം നടത്തിയ യുവനടനെ നാട്ടുകാര്‍ മര്‍ദ്ദിച്ചു. തൃശൂര്‍ സ്വദേശി സിദ്ധു സന്തോഷ് റാമിനാണ് മര്‍ദ്ദനം നേരിടേണ്ടിവന്നത്.
ടെക്‌നോപാര്‍ക്കിന് സമീപത്തെ സി.എഫ്.സി റെസ്‌റ്റോറന്റിലായിരുന്നു യുവനടന്റെ അതിക്രമം. ജീവനക്കാരിയെ കടന്നു പിടിച്ചത് ചോദ്യം ചെയ്ത രണ്ടുപേരെ സിദ്ധു കുത്തി പരുക്കേല്‍പ്പിക്കുകയും ചെയ്തു.
തുടര്‍ന്ന് ഹോട്ടലില്‍ നിന്നും പുറത്തിറങ്ങിയ നടനെ നാട്ടുകാര്‍ കൂട്ടംചേര്‍ന്ന് മര്‍ദ്ദിക്കുകയായിരുന്നു. ഇതിനിടെ ഹെല്‍മറ്റുമായി ഒരാള്‍ ഓടിയെത്തി സിദ്ധുവിനെ അടിക്കാന്‍ തുടങ്ങി. ഇയാളില്‍ നിന്ന് ഹെല്‍മറ്റ് പിടിച്ചുവാങ്ങി മറ്റുള്ളവരും മര്‍ദ്ദനം തുടര്‍ന്നു. ഒടുവില്‍ കഴക്കൂട്ടത്തില്‍ നിന്നും പോലീസെത്തി സിദ്ധുവിനെ അറസ്റ്റു ചെയ്തുകൊണ്ടുപോകുകയായിരുന്നു.
ഭക്ഷണവുമായെത്തിയ ജീവനകകകാരിയെ നടന്‍ കടന്നു പിടിക്കുകയായിരുന്നു. ഇക്കാര്യം ചോദ്യം ചെയ്ത ഹോട്ടല്‍ മാനേജരേയും മറ്റൊരാളെയും കുത്തിപരുക്കേല്‍പ്പിച്ചശേഷം സിദ്ധു ഓടി രക്ഷപ്പെടുകയായിരുന്നു. ഇങ്ങനെ രക്ഷപ്പെടാന്‍ ശ്രമിക്കുമ്പോഴാണ് നാട്ടുകാര്‍ ഇയാളെ പിടികൂടി മര്‍ദ്ദിച്ചത്.
ഹോട്ടല്‍ മാനേജര്‍ സാലിമിനും, ഭക്ഷണം കഴിക്കാനെത്തിയ സരള്‍ എന്ന യുവാവിനുമാണ് കുത്തേറ്റത്. അതിക്രമത്തിനുശേഷം ഹോട്ടലില്‍ നിന്നിറങ്ങിയ സിദ്ധുസന്തോഷിനെ ടെക്‌നോപാര്‍ക്കിനു സമീപത്തുവെച്ചാണ് നാട്ടുകാര്‍ പിടികൂടിയത്.
കേസില്‍ അറസ്റ്റിലായ സിദ്ധു ഇപ്പോള്‍ റിമാന്റിലാണ്. ദുല്‍ഖര്‍ സല്‍മാന്‍ നായകനായ സെക്കന്റ് ഷോ, ഹാംഗ് ഓവര്‍, രഘുവിന്റെ സ്വന്തം റസിയ തുടങ്ങിയ ചിത്രങ്ങളില്‍ സിദ്ധു അഭിനയിച്ചിട്ടുണ്ട്.