ബെംഗളുരു: ബി.ജെ.പി നേതാവ് ജനാര്‍ദ്ദന്‍ റെഡ്ഡിയുടെ മനുഷ്യത്വ വിരുദ്ധമായ പ്രവൃത്തികള്‍ക്ക് ബെല്ലാരിയിലെ ജനങ്ങള്‍ നല്‍കിയ ശാപമാണ് ഉപതെരഞ്ഞെടുപ്പിലെ തിരിച്ചടിയെന്ന് കോണ്‍ഗ്രസ് നേതാവ് സിദ്ധരാമയ്യ. ദീപാവലി ദിനത്തില്‍ ബെല്ലാരിയിലെ ജനത ഇരുട്ടില്‍ നിന്നും വെളിച്ചത്തിലേക്ക് വന്നിരിക്കുകയാണെന്നും അദ്ദേഹം പറഞ്ഞു.
സിദ്ധരാമയ്യയുടെ മകന്റെ മരണവുമായി ബന്ധപ്പെട്ട ജനാര്‍ദ്ദന റെഡ്ഡിയുടെ പരാമര്‍ശങ്ങള്‍ എടുത്തു പറഞ്ഞായിരുന്നു അദ്ദേഹം ഇക്കാര്യം പറഞ്ഞത്. മുഖ്യമന്ത്രിയുടെ ഓഫീസിനെ ദുരുപയോഗം ചെയ്ത് തന്നെ തന്റെ കുട്ടികളില്‍ നിന്നകറ്റി നാലുവര്‍ഷം ജയിലില്‍ ശിക്ഷിച്ചതിനുള്ള ദൈവത്തിന്റെ ശിക്ഷയാണ് സിദ്ധരാമയ്യയുടെ മകന്റെ മരണം എന്നായിരുന്നു ജനാര്‍ദ്ദന റെഡ്ഡി പറഞ്ഞത്.
“എന്നെ എന്റെ മക്കളില്‍ നിന്നും അകറ്റിയതിന് ദൈവം അദ്ദേഹത്തെ ശിക്ഷിച്ചു” എന്നാണ് റെഡ്ഡി പറഞ്ഞത്. 2016ല്‍ ബെല്‍ജിയത്തെ ആശുപത്രിയില്‍ വെച്ചാണ് അസുഖത്തെ തുടര്‍ന്ന് സിദ്ധരാമയ്യയുടെ മകന്‍ രാകേഷ് സിദ്ധരാമയ്യ മരണപ്പെട്ടത്. ഇതുമായി ബന്ധപ്പെട്ട ജനാര്‍ദ്ദന റെഡ്ഡിയുടെ പരാമര്‍ശം വലിയ വിവാദമായിരുന്നു.
ബി.ജെ.പിയുടെ ശക്തികേന്ദ്രമായ ബെല്ലാരിയില്‍ ഒന്നരലക്ഷത്തോളം വോട്ടിനാണ് കോണ്‍ഗ്രസ്-ജെ.ഡി.എസ് സഖ്യം മുന്നേറുന്നത്.
വി.എസ് ഉഗ്രപ്പയാണ് കോണ്‍ഗ്രസിന്റെ സ്ഥാനാര്‍ത്ഥി. ബി. ശ്രീരാമലുവിന്റെ സഹോദരിയും മുന്‍ എം.പിയുമായ ജെ. ശാന്തയാണ് ബി.ജെ.പി സ്ഥാനാര്‍ത്ഥി.
മണ്ഡലത്തിലെ എം.പിയായിരുന്ന ബി ശ്രീരാമലു നിയമസഭ തെരഞ്ഞെടുപ്പില്‍ മൊല്‍ക്കല്‍മാരു നിയോജക മണ്ഡലത്തില്‍ നിന്ന് ജയിച്ച് എം.എല്‍.എയായതോടെയാണ് ബെല്ലാരിയില്‍ ഉപതെരഞ്ഞെടുപ്പ് ആവശ്യമായി വന്നത്.
ബി.ജെ.പിയുടെ ഉറച്ച വോട്ട് ബാങ്കായ ലിംഗായത്തുകള്‍ ഈ തെരഞ്ഞെടുപ്പില്‍ കോണ്‍ഗ്രസിന് വോട്ട് ചെയ്തെന്നാണ് റിപ്പോര്‍ട്ടുകള്‍. മുന്‍ മുഖ്യമന്ത്രിയും ലിംഗായത്ത് സമുദായക്കാരനുമായ ബി.എസ് യെദ്യൂരപ്പയെ ശ്രീരാമലു ഒതുക്കാന്‍ ശ്രമിക്കുകയും അടുത്ത മുഖ്യമന്ത്രിയാകുവാന്‍ പരിശ്രമിക്കുന്നു എന്ന വികാരം ലിംഗായത്ത് സമുദായത്തിനിടക്ക് രൂപപ്പെട്ടതിനെ തുടര്‍ന്നാണ് കോണ്‍ഗ്രസിന് വോട്ട് ചെയ്തതെന്നാണ് നിരീക്ഷകര്‍ പറയുന്നത്.