ഫലസ്തീന്‍ ഐക്യദാര്‍ഢ്യം; ശശി തരൂരിനെ ഒഴിവാക്കി തിരുവനന്തപുരത്തെ മഹല്ല് എംപവര്‍മെന്റ് മിഷന്‍
ഡൂള്‍ന്യൂസ് ഡെസ്‌ക്
Friday, 27th October 2023, 7:00 pm
പട്ടം: തിരുവന്തപുരത്തെ ഫലസ്തീന്‍ ഐക്യദാര്‍ഢ്യ സംഗമത്തില്‍ നിന്ന് ശശി തരൂരിനെ ഒഴിവാക്കി. തിരുവനന്തപുരം നഗരത്തിലെ 32 മുസ്ലിം ജമാഅത്തുകളുടെ കൂട്ടായ്മയായ മഹല്ല് എംപവര്‍മെന്റ് മിഷന്‍ സംഘടിപ്പിച്ച ഫലസ്തീന്‍ ഐക്യദാര്‍ഢ്യ റാലിയില്‍ നിന്നാണ് തരൂരിനെ ഒഴിവാക്കിയത്. കോഴിക്കോട് മുസ്ലിം ലീഗ് നടത്തിയ ഐക്യദാര്‍ഢ്യ റാലിയില്‍ തരൂര്‍ നടത്തിയ വിവാദ പരാമര്‍ശത്തെ തുടര്‍ന്നാണ് തീരുമാനം.
പരിപാടിയുടെ ഉദ്ഘാടകനായി തീരുമാനിച്ചിരുന്നത് ശശി തരൂരിനെയായിരുന്നു. എം.എ. ബേബിയക്കടക്കമുള്ള സി.പി.ഐ.എം നേതാക്കളെ പരിപാടിയിലേക്ക് ക്ഷണിച്ചിരുന്നു.
എം.ഇ.എം സൂമില്‍ നടത്തിയ യോഗത്തിലാണ് തരൂരിനെ ഫലസ്തീന്‍ അനുകൂല സംഗമത്തില്‍ പങ്കെടുപ്പിക്കേണ്ടെന്ന് തീരുമാനമായത്. പരാമര്‍ശത്തിലുള്ള പ്രതിഷേധം തരൂരിനെ അറിയിക്കാന്‍ തീരുമാനിച്ചതായും സംഘടനാ നേതാക്കള്‍ മാധ്യമങ്ങളോട് പറഞ്ഞു.
