കോഴിക്കോട്: ഷെയ്ന്‍ നിഗം, നിമിഷാ സജയന്‍ എന്നിവരെ പ്രധാനകഥാപാത്രങ്ങളാക്കി പ്രശസ്ത ചിത്രസംയോജകന്‍ ബി അജിത് കുമാര്‍ രചനയും സംവിധാനവും നിര്‍വഹിക്കുന്ന “ഈട” യുടെ രണ്ടാമത്തെ ട്രെയിലര്‍ പുറത്തിറങ്ങി. നിവിന്‍ പോളിയാണ് ചിത്രത്തിന്റെ ട്രെയിലര്‍ പുറത്ത് വിട്ടത്.
വടക്കന്‍ മലബാറില്‍ ഇവിടെ എന്ന വാക്കിന് പകരമാണ് “ഈട” എന്ന് പറയുന്നത്. കണ്ണൂരിന്റെ രാഷ്ട്രീയ പശ്ചാത്തലമാണ് ട്രെയിലറിലെ പ്രധാന പ്രമേയം. ചിത്രം ജനുവരി അഞ്ചിന് തീയേറ്ററുകളില്‍ എത്തും.
ഡെല്‍റ്റ സ്‌റുഡിയോക്ക് വേണ്ടി കളക്റ്റീവ് ഫേസിന്റെ ബാനറില്‍ രാജീവ് രവി പുറത്തിറക്കുന്ന ചിത്രത്തിന്റെ നിര്‍മാണം ശര്‍മിള രാജയാണ്. സുരഭി ലക്ഷ്മി, അലന്‍സിയര്‍, പി ബാലചന്ദ്രന്‍ , സുജിത് ശങ്കര്‍, മണികണ്ഠന്‍ ആചാരി , ബാബു അന്നൂര്‍ , ഷെല്ലി കിഷോര്‍ , രാജേഷ് ശര്‍മ്മ , സുധി കോപ്പ, സുനിത തുടങ്ങിയവര്‍ ഈട യില്‍ പ്രധാനവേഷത്തില്‍ എത്തും.
ജോണ്‍ പി വര്‍ക്കി , ചന്ദ്രന്‍ വെയാട്ടുമ്മല്‍, ഡോണ്‍ വിന്‍സെന്റ്, സുബ്രമണ്യന്‍ കെ വി, അശോക് പൊന്നപ്പന്‍ എന്നിവര്‍ ചേര്‍ന്നാണ് ചിത്രത്തിന്റെ സംഗീതം ഒരുക്കിയിരിക്കുന്നത്. സുകുമാര്‍ തെക്കേപ്പാട്ട്, ടി.ആര്‍. എസ്. മുത്തുകുമാര്‍, ഇ.കെ. അയ്യപ്പന്‍ എന്നിവരാണ് എക്സിക്യുട്ടീവ് പ്രൊഡ്യൂസര്‍മാര്‍. രാജീവ് രവിയുടെ അസോസിയേറ്റായിരുന്ന പപ്പുവാണ് ഛായാഗ്രഹണം നിര്‍വഹിക്കുന്നത്.