ലാ ലിഗയില്‍ കഴിഞ്ഞ ദിവസം നടന്ന മത്സരത്തില്‍ റയല്‍ സോസിഡാഡ് ഒന്നിനെതിരെ രണ്ട് ഗോളുകള്‍ക്ക് സെവിയ്യയെ തോല്‍പ്പിച്ചു. മത്സരത്തില്‍ സ്പാനിഷ് സൂപ്പര്‍ താരം സെര്‍ജിയോ റാമോസ് ചുവപ്പ് കാര്‍ഡ് കണ്ട് പുറത്തായിരുന്നു.
ഈ ചുവപ്പ് കാര്‍ഡോടെ ഒരു മോശം റെക്കോഡും റാമോസിനെ തേടിയെത്തിയിരിക്കുകയാണ്. ലാ ലിഗ ചരിത്രത്തില്‍ ഏറ്റവും കൂടുതല്‍ റെഡ് കാര്‍ഡുകള്‍ കണ്ട താരമെന്ന റെക്കോഡാണ് റാമോസിന്റെ പേരിലായത്. സ്പാനിഷ് ലീഗില്‍ 29 തവണയാണ് റാമോസ് ചുവപ്പ് കാര്‍ഡ് കണ്ട് പുറത്തായത്.
ലാ ലിഗയില്‍ റാഫേല്‍ മാര്‍ക്വാസ് 21 റെഡ് കാര്‍ഡും ഫിലിപ്പെ മെലൊ 20 തവണയുമാണ് റെഡ് കാര്‍ഡ് കണ്ട് പുറത്തായത്. ലാ ലിഗയില്‍ 20ന് മുകളില്‍ ചുവപ്പുകാര്‍ഡ് കണ്ട താരങ്ങള്‍ ഇവര്‍ മൂന്ന് പേര്‍ മാത്രമാണ്.
Death, taxes and Sergio Ramos getting a red card 🟥😬
മത്സരത്തിന്റെ 88ാം മിനിട്ടില്‍ ആയിരുന്നു റാമോസ് ചുവപ്പ് കാര്‍ഡ് കണ്ട് പുറത്തായത്. റയല്‍ സോസിഡാഡ് താരം ബ്രെയ്സ് മെന്‍ഡെസിനെ ടാക്കിള്‍ ചെയ്തതിനായിരുന്നു റാമോസ് ചുവപ്പ് കാര്‍ഡിന്റെ ശിക്ഷ നേരിട്ടത്.
അതേ മിനിട്ടില്‍ തന്നെ ജീസസ് നവാസും ചുവപ്പ് കാര്‍ഡ് കണ്ടുപുറത്തായി. നവാസിന്റെ പ്രൊഫഷണല്‍ ഫുട്‌ബോള്‍ കരിയറിലെ ആദ്യ റെഡ് കാര്‍ഡ് ആയിരുന്നു ഇത്. ഈ രണ്ട് താരങ്ങളും ഇല്ലാതെയായിരിക്കും സെവിയ്യ അടുത്ത മത്സരത്തിനിറങ്ങുക. പ്രധാന താരങ്ങളുടെ അഭാവം വലിയ തിരിച്ചടിയായിരിക്കും ടീമിന് നല്‍കുക.
