ഒടുവില്‍ വിതുമ്പിക്കരഞ്ഞ് വിടവാങ്ങല്‍ പ്രഖ്യാപനം; സെര്‍ജിയോ അഗ്യൂറോ വിരമിച്ചു
സ്പോര്‍ട്സ് ഡെസ്‌ക്
Wednesday, 15th December 2021, 5:47 pm
ബാഴ്സലോണ: ബാഴ്സലോണയുടെ അര്‍ജന്റീന ഫുട്ബോള്‍ താരം സെര്‍ജിയോ അഗ്യൂറോ വിരമിച്ചു. 18 വര്‍ഷത്തെ ഫുട്ബോള്‍ കരിയറിനാണ് ഇതോടെ അന്ത്യമാകുന്നത്.
ഹൃദ്രോഗം സ്ഥിരീകരിച്ചതോടെയാണ് അഗ്യൂറോ കളി മതിയാക്കാന്‍ തീരുമാനിച്ചത്. ബാഴ്സലോണയില്‍ നടത്തിയ വാര്‍ത്താ സമ്മേളനത്തിലാണ് വിരമിക്കല്‍ പ്രഖ്യാപിച്ചത്. വിരമിക്കല്‍ പ്രഖ്യാപനത്തിനിടെ താരം വിതുമ്പിക്കരഞ്ഞു.
വിരമിക്കാന്‍ സാധ്യതയുണ്ടെന്ന റിപ്പോര്‍ട്ടുകള്‍ നേരത്തെ ഉണ്ടായിരുന്നെങ്കിലും അതിനെക്കുറിച്ച് ഇപ്പോള്‍ ചിന്തിക്കുന്നില്ലെന്നായിരുന്നു അഗ്യൂറോ പ്രതികരിച്ചത്.
കഴിഞ്ഞ മാസം ലാ ലിഗയില്‍ അലാവസുമായ മത്സരത്തിനിടെ നെഞ്ചുവേദന അനുഭവപ്പെട്ട താരത്തെ ആശുപത്രിയില്‍ പ്രവേശിപ്പിച്ചിരുന്നു. ഇതിനുപിന്നാലെ താരത്തിന് മൂന്നുമാസം കളത്തിലിറങ്ങാന്‍ സാധിക്കില്ലെന്ന് ബാഴ്സലോണ പ്രസ്താവനയില്‍ വ്യക്തമാക്കിയിരുന്നു.
