ബ്രസീല്‍ സൂപ്പര്‍ താരം നെയ്മര്‍ ബാഴ്സയിലേക്ക് മടങ്ങുന്നുവെന്ന റിപ്പോര്‍ട്ടുകള്‍ വ്യാപകമായി പ്രചരിക്കുന്നുണ്ട്. വിഷയത്തില്‍ ഔദ്യോഗിക റിപ്പോര്‍ട്ടുകളൊന്നും പുറത്തുവന്നിട്ടില്ല. വിഷയത്തില്‍ പ്രതികരണമറിയിച്ചിരിക്കുകയാണ് ബാഴ്‌സലോണ എഫ്.സിയുടെ ക്യാപ്റ്റന്‍ സെര്‍ജി റോബേര്‍ട്ടോ. നെയ്മര്‍ തന്റെ സുഹൃത്താണെന്നും അദ്ദേഹം ബാഴ്സയിലേക്ക് തിരിച്ചുവരണമെന്നാണ് താന്‍ ആഗ്രഹിക്കുന്നതെന്നും റോബേര്‍ട്ടോ പറഞ്ഞു. സ്പാനിഷ് ഔട്‌ലെറ്റാണ് ഇക്കാര്യം റിപ്പോര്‍ട്ട് ചെയ്തത്.
‘ഞാന്‍ നെയ്മറോട് സംസാരിച്ചിരുന്നു. അദ്ദേഹം തിരിച്ചുവരുന്ന കാര്യത്തില്‍ ആകാംക്ഷാഭരിതനാണ്. ഞാനും അദ്ദേഹം തിരിച്ചുവരാന്‍ ആഗ്രഹിക്കുന്നുണ്ട്. കാരണം നെയ്മര്‍ എന്റെ സുഹൃത്തും മുന്‍ സഹതാരവുമാണ്. മാത്രവുമല്ല, അദ്ദേഹം മറ്റുള്ളവരില്‍ നിന്ന് വ്യത്യസ്തനായ കളിക്കാരനാണ്.
നെയ്മര്‍ ഇവിടെ ഉണ്ടായിരുന്നപ്പോള്‍ ഞാനെന്റെ കരിയറിലെ ഏറ്റവും മികച്ച കാലഘട്ടം അദ്ദേഹത്തോടൊപ്പം ചെലവഴിച്ചിട്ടുണ്ട്. നെയ്മര്‍ തിരിച്ചുവരേണ്ട കാര്യം തീരുമാനിക്കേണ്ടത് ഞാനല്ല. പക്ഷെ ഇപ്പോള്‍ നമുക്ക് സാധ്യമായ ഒരു ടീമാണ് ആവശ്യം,’ റോബേര്‍ട്ടോ പറഞ്ഞു.
