ന്യൂദല്‍ഹി: വിമത എം.എല്‍.എമാര്‍ കോണ്‍ഗ്രസില്‍ മടങ്ങിയെത്താതെ ചര്‍ച്ചയില്ലെന്ന നിലപാടെടുത്ത് രാജസ്ഥാന്‍ കോണ്‍ഗ്രസ് നേതൃത്വം. തങ്ങള്‍ക്ക് ഭൂരിപക്ഷമുണ്ടെന്നും അത് നിയമസഭയില്‍ തെളിയിക്കുമെന്നും കോണ്‍ഗ്രസ് പറയുന്നു.
പാര്‍ട്ടിക്ക് ആവശ്യത്തിനുള്ള എണ്ണം അംഗങ്ങളുണ്ട്. ഭൂരിപക്ഷം തെളിയിക്കാനും തയ്യാറാണ്. പ്രതിപക്ഷം അവിശ്വാസ പ്രമേയത്തിന് തയ്യാറാവാതിരിക്കാനുള്ള സാധ്യത പോലുമില്ലെന്ന് കോണ്‍ഗ്രസ് നേതാവ് അജയ് മാക്കെന്‍ പറഞ്ഞു.
ഉപാധികളൊന്നുമില്ലാതെ വേണം സച്ചിന്‍ പൈലറ്റ് മടങ്ങിവരുന്നെങ്കില്‍ വരുവാന്‍. അല്ലെങ്കില്‍ അത് തെറ്റായ കീഴ്‌വഴക്കം സൃഷ്ടിക്കുമെന്നും കോണ്‍ഗ്രസ് ഉന്നത നേതൃത്വം പ്രതികരിച്ചു.
രാജസ്ഥാനില്‍ രാഷ്ട്രീയ പ്രതിസന്ധികള്‍ തുടരുന്നതിനിടെ മുഖ്യമന്ത്രി അശോക് ഗെലോട്ടിന്റെ നേതൃത്വത്തിലുള്ള കോണ്‍ഗ്രസ് സര്‍ക്കാരിന് നേരിയ ആശ്വാസം ലഭിച്ചിരുന്നു. കോണ്‍ഗ്രസില്‍ ലയിച്ച ബി.എസ്.പി എം.എല്‍.എമാര്‍ക്കെതിരായ ഹരജികള്‍ രാജസ്ഥാന്‍ ഹൈക്കോടതി തള്ളി. ബി.ജെ.പി എം.എല്‍.എയും ബി.എസ്.പിയും സമര്‍പ്പിച്ച വിവിധ ഹരജികളാണ് ഹൈക്കോടതി തള്ളിയത്.
