യോഗി സര്‍ക്കാരിനെ വിമര്‍ശിച്ചു; മുന്‍ ഗവര്‍ണര്‍ക്കെതിരെ രാജ്യദ്രോഹക്കുറ്റം ചുമത്തി യു.പി പൊലീസ്
ഡൂള്‍ന്യൂസ് ഡെസ്‌ക്
Monday, 6th September 2021, 3:00 pm
ലഖ്‌നൗ: യോഗി ആദിത്യനാഥ് സര്‍ക്കാരിനെ വിമര്‍ശിച്ചതിന് മുന്‍ ഗവര്‍ണര്‍ക്കെതിരെ രാജ്യദ്രോഹക്കേസ്. കോണ്‍ഗ്രസ് നേതാവും ഉത്തരാഖണ്ഡ്, മിസോറാം സംസ്ഥാനങ്ങളിലെ ഗവര്‍ണറുമായിരുന്ന അസീസ് ഖുറേഷിയ്‌ക്കെതിരെയാണ് യു.പി പൊലീസ് രാജ്യദ്രോഹം ചുമത്തി കേസെടുത്തിരിക്കുന്നത്.
ബി.ജെ.പി നേതാവ് ആകാശ് കുമാര്‍ സക്‌സേനയുടെ പരാതിയിലാണ് കേസ്. രക്തം ഊറ്റിക്കുടിക്കുന്ന ദുര്‍ഭൂതത്തെപ്പോലെയാണ് യോഗി സര്‍ക്കാര്‍ എന്നായിരുന്നു ഖുറേഷിയുടെ പരാമര്‍ശം
ഖുറേഷിയുടെ പരാമര്‍ശം സമൂഹത്തില്‍ പ്രശ്‌നങ്ങള്‍ സൃഷ്ടിക്കുന്നതും രണ്ട് വിഭാഗങ്ങള്‍ തമ്മില്‍ സ്പര്‍ധ വളര്‍ത്തുന്നതുമാണെന്നാണ് സക്‌സേനയുടെ പരാതിയില്‍ പറയുന്നത്.
ഖുറേഷിയുടെ പ്രതികരണത്തിന്റെ വീഡിയോ ദൃശ്യങ്ങളടങ്ങിയ പെന്‍ഡ്രൈവ് അടക്കം പരാതിയോടൊപ്പം പൊലീസിന് കൈമാറിയിട്ടുണ്ടെന്ന് സക്‌സേന പറഞ്ഞു.
