ഉചിതമായ തീരുമാനം സര്‍ക്കാരുകള്‍ക്കെടുക്കാം; സ്‌കൂള്‍ തുറക്കലില്‍ ഇടപെടില്ലെന്ന് സുപ്രീംകോടതി
ഡൂള്‍ന്യൂസ് ഡെസ്‌ക്
Monday, 20th September 2021, 3:28 pm
ന്യൂദല്‍ഹി: കൊവിഡ് പശ്ചാത്തലത്തില്‍ ഒന്നര വര്‍ഷമായി അടച്ചിട്ടിരിക്കുന്ന സ്‌കൂളുകളില്‍ അധ്യയനം പുനരാരംഭിക്കുന്നതില്‍ ഇടപെടില്ലെന്ന് സുപ്രീംകോടതി. ജസ്റ്റിസുമാരായ ഡി.വൈ. ചന്ദ്രചൂഢും ബി.വി. നാഗരത്‌നയും അടങ്ങിയ ബെഞ്ചിന്റേതാണ് സുപ്രധാന നിരീക്ഷണം.
സ്‌കൂള്‍ തുറക്കാനുള്ള കേന്ദ്ര-സംസ്ഥാന സര്‍ക്കാരുകളുടെ തീരുമാനത്തില്‍ ഇടപെടാനാവില്ലെന്നാണ് കോടതി പറഞ്ഞത്.
‘എല്ലാ കുട്ടികളും സ്‌കൂളില്‍ പോകണമെന്ന് കോടതിയ്ക്ക് എങ്ങനെ പറയാനാകും? ഉചിതമായ തീരുമാനം സര്‍ക്കാരുകള്‍ എടുക്കട്ടെ,’ കോടതി പറഞ്ഞു.
സ്‌കൂള്‍ തുറക്കാന്‍ നിര്‍ദേശിക്കണമെന്നാവശ്യപ്പെട്ടുള്ള ഹരജിയെ കോടതി രൂക്ഷമായി വിമര്‍ശിച്ചു. സ്‌കൂള്‍ തുറക്കണമെന്നാവശ്യപ്പെട്ട് വിദ്യാര്‍ത്ഥികളാണ് കോടതിയെ സമീപിച്ചത്.
