ഖത്തര്‍ ലോകകപ്പിന് ഇനി ഏതാനും ദിവസങ്ങള്‍ മാത്രമാണ് ബാക്കി. വേള്‍ഡ് കപ്പിനുള്ള ഫൈനല്‍ സ്‌ക്വാഡ് പ്രഖ്യാപിക്കാനും ഇനി അധിക നാളില്ല. ബ്രസീലടക്കമുള്ള ടീമുകള്‍ ഇതിനകം തങ്ങളുടെ സ്‌ക്വാഡ് പ്രഖ്യാപിച്ച് കഴിഞ്ഞു.
എന്നാല്‍ അര്‍ജന്റീനക്കിത് പരിക്കിന്റെ നാളുകളാണ്. ഒട്ടുമിക്ക താരങ്ങളും പരിക്കിനെ തുടര്‍ന്ന് വിശ്രമത്തിലാണ്. അതുകൊണ്ട് തന്നെ മാനേജര്‍ സ്‌കലോണി തങ്ങളുടെ സ്‌ക്വാഡിന്റെ അന്തിമ ലിസ്റ്റ് നവംബര്‍ 14ന് പ്രഖ്യാപിക്കുമെന്ന് അറിയിക്കുകയായിരുന്നു.
മുന്‍നിര താരങ്ങള്‍ പരിക്കിന്റെ പിടിയിലായതിനാല്‍ അവസാന നിമിഷം വരെ അവരുടെ കാര്യം കൂടി പരിഗണിച്ചതിനുശേഷമായിരിക്കും അദ്ദേഹം ഫൈനല്‍ ലിസ്റ്റ് പുറത്തുവിടുക. 46 താരങ്ങള്‍ ഉള്‍പ്പെട്ട പ്രാഥമിക ലിസ്റ്റ് ആയിരുന്നു ആദ്യം സ്‌കലോണി ഫിഫക്ക് നല്‍കിയിരുന്നത്.
കഴിഞ്ഞ ദിവസം അത് 31 ആയി ചുരുക്കുകയും അത് വീണ്ടും 28 ആക്കി കുറക്കുകയുമായിരുന്നു. മൂന്ന് താരങ്ങളെ കൂടിയാണ് അദ്ദേഹം ഒഴിവാക്കിയിട്ടുള്ളത്. ഗോള്‍ കീപ്പര്‍ യുവാന്‍ മുസ്സോ, തിയാഗോ അല്‍മാഡ, ഫാകുണ്ടോ മദീന എന്നിവരെയാണ് സ്‌ക്വാഡില്‍ നിന്ന് റിലീസ് ചെയ്തത്.
26 പേരുടെ ലിസ്റ്റാണ് അവസാനമായി ഫിഫക്ക് കൈമാറേണ്ടത്. അതായത് ഇനി ഈ സ്‌ക്വാഡില്‍ നിന്ന് രണ്ട് താരങ്ങളെ കൂടി ഒഴിവാക്കേണ്ടതുണ്ട്. ലോ സെല്‍സോ, പൗലോ ഡിബാല എന്നിവരുടെ പരിക്ക് വിവരങ്ങള്‍ വിശകലനം ചെയ്തതിനുശേഷം മാത്രമേ അന്തിമ തീരുമാനമെടുക്കുകയുള്ളൂ.
In the next couple of days, Lionel Scaloni will give out the final 26 selected player squad list that will represent Argentina in the FIFA World Cup 2022. 🏆🇦🇷 pic.twitter.com/UGdet50T2V
