ഭോപ്പാല്‍: മധ്യപ്രദേശില്‍ വിമത എം.എല്‍.എമാരുടെ രാജിക്കാര്യത്തില്‍ നിയമസഭാ സ്പീക്കര്‍ക്ക് തീരുമാനമെടുക്കാമെന്ന് സുപ്രീംകോടതി. ഹരജിയില്‍ വ്യാഴാഴ്ച വാദം കേള്‍ക്കല്‍ തുടരുമെന്നും കോടതി അറിയിച്ചു.
അതേസമയം വിമത എം.എല്‍.എമാര്‍ ഉപതെരഞ്ഞെടുപ്പിനെ നേരിടണമെന്നും ശേഷം അവിശ്വാസവോട്ടെടുപ്പ് നടത്താമെന്നും കോണ്‍ഗ്രസ് സുപ്രീംകോടതിയില്‍ അറിയിച്ചു. ചാര്‍ട്ടേഡ് വിമാനവും മനോഹരമായ ഹോട്ടലില്‍ താമസവും വാഗ്ദാനം ചെയ്യുമ്പോഴേക്കും ഓടിപ്പോവുക എന്നതല്ല ഒരു എം.എല്‍.എയുടെ കടമയെന്ന് സുപ്രീം കോടതിയില്‍ കോണ്‍ഗ്രസിന് വേണ്ടി ഹാജരായ അഭിഭാഷകന്‍ ദുഷ്യന്ത് ദവെ പറഞ്ഞു.
ഭരണഘടനയെ വഞ്ചിച്ചിരിക്കുകയാണ് ബി.ജെ.പിയെന്നും ഭരണഘടനാ ധാര്‍മ്മികതയെ അവര്‍ നശിപ്പിക്കുകയാണെന്നും ദുഷ്യന്ത് ദവെ പറഞ്ഞു. 22 വിമതര്‍ അവരുടെ നിയമസഭാ മണ്ഡലങ്ങളെ പ്രതിനിധീകരിച്ച് സഭയില്‍ എത്താത്ത പക്ഷം വിശ്വാസ വോട്ടെടുപ്പ് നടത്താന്‍ കഴിയില്ലെന്നും ദവെ കോടതിയെ അറിയിച്ചു.
എം.എല്‍.എമാരെ ഭോപ്പാലിലേക്ക് തിരിച്ചുകൊണ്ടുവന്ന് അവരെ നിര്‍ബന്ധിച്ച് രാജിവെപ്പിച്ചതാണോ എന്ന ചോദിക്കേണ്ട ചുമതല ഗവര്‍ണര്‍ക്കാണെന്നും എന്നാല്‍ അദ്ദേഹം അത് ചെയ്തില്ലെന്നും ദവെ സുപ്രീം കോടതിയില്‍ പറഞ്ഞു.
