ന്യൂദല്‍ഹി: ജാമിയ മിലിയ യൂണിവേഴ്‌സിറ്റിയിലെ നിയമ വിദ്യാര്‍ഥിക്ക് കശ്മീരിലുള്ള മാതാപിതാക്കളെ സന്ദര്‍ശിക്കാന്‍ സുപ്രീം കോടതി അനുമതി. അദ്ദേഹത്തിന് സുരക്ഷയൊരുക്കാന്‍ പൊലീസിന് കോടതി നിര്‍ദേശം നല്‍കുകയും ചെയ്തു.
ജാമിയ മിലിയ യൂണിവേഴ്‌സിറ്റിയിലെ വിദ്യാര്‍ഥിയായ മുഹമ്മദ് അലിം സെയ്ദാണ് കശ്മീരിലെ അനന്ത് നാഗ് ജില്ലയിലുള്ള മാതാപിതാക്കളെക്കുറിച്ച് യാതൊരു വിവരവുമില്ലെന്ന് ചൂണ്ടിക്കാട്ടി കോടതിയെ സമീപിച്ചത്.
മാതാപിതാക്കളെ സന്ദര്‍ശിച്ചതിനുശേഷം ഇതുസംബന്ധിച്ച് സത്യവാങ്മൂലം നല്‍കാനും കോടതി അലിം സെയ്ദിന് നിര്‍ദേശം നല്‍കിയിട്ടുണ്ട്. ചീഫ് ജസ്റ്റിസ് രഞ്ജന്‍ ഗോഗോയ്, ജസ്റ്റിസുമാരായ എസ്.എ ബോബ്‌ഡെ, എസ്. അബ്ദുള്‍ നസീര്‍ എന്നിവരുള്‍പ്പെട്ട ബെഞ്ചാണ് ഹരജി പരിഗണിച്ചത്.
അലിം സെയ്ദിന് വ്യാഴാഴ്ച തന്നെ അനന്ത്‌നാഗിലേക്ക് പോകണമെന്നുണ്ടെങ്കില്‍ ഒരു മണിക്കൂറിനുള്ളില്‍ തന്നെ കോടതി ഉത്തരവ് അദ്ദേഹത്തിന് നല്‍കണമെന്നും മുതിര്‍ന്ന അഭിഭാഷകന്‍ സഞ്ജയ് ഹെഡ്‌ഗെയോട് കോടതി നിര്‍ദേശിച്ചു.
അഡ്വ മൃഗന്‍ക് പ്രഭാകര്‍ വഴിയാണ് സയ്യിദ് സുപ്രീം കോടതിയെ സമീപിച്ചത്. അനന്ത്‌നാഗ് സ്വദേശിയായ തനിക്ക് അവിടെയുള്ള മാതാപിതാക്കളെക്കുറിച്ച് ആഗസ്റ്റ് നാല്, അഞ്ച് തിയ്യതികള്‍ക്കുശേഷം യാതൊരു വിവരവുമില്ലെന്നാണ് സെയ്ദ് ഹരജിയില്‍ പറയുന്നത്. ഒരു തരത്തിലും തനിക്ക് മാതാപിതാക്കളുമായി ബന്ധപ്പെടാന്‍ കഴിയാത്തതിനാല്‍ അവര്‍ പൊലീസ് കസ്റ്റഡിയിലാണോ എന്ന് സംശയിക്കുന്നതായും അദ്ദേഹം അറിയിച്ചിരുന്നു.
ആര്‍ട്ടിക്കിള്‍ 370 റദ്ദാക്കിയതിനു പിന്നാലെ ജമ്മുകശ്മീരില്‍ ഫോണ്‍, ഇന്റര്‍നെറ്റ് സേവനകള്‍ പൂര്‍ണമായി നിര്‍ത്തിവെച്ചിരിക്കുകയാണ്. യാത്രാനിയന്ത്രണവും ഏര്‍പ്പെടുത്തിയിട്ടുണ്ട്. ഇത് ഭരണഘടന ഉറപ്പുനല്‍കുന്ന മൗലികാവകാശത്തിന് എതിരാണെന്നും അദ്ദേഹം ഹരജിയില്‍ ചൂണ്ടിക്കാട്ടിയിരുന്നു.