ന്യൂദല്‍ഹി: ഒരാള്‍ നല്ല ബുദ്ധിശാലിയാകുന്നതും ഭംഗിയുള്ളതുമാകുന്നത് ജീനിലൂടെയാണെന്ന് ശശി തരൂര്‍. ഇതിന് വേണ്ടി നിങ്ങളുടെ രക്ഷിതാക്കളെ വിവേകപൂര്‍വം തെരഞ്ഞെടുക്കണമെന്ന ശശി തരൂരിന്റെ ഉപദേശത്തെ ഏറ്റെടുത്ത് സോഷ്യല്‍ മീഡിയ.
നാഗലാന്റിലെ ഒരു കൂട്ടം ചെറുപ്പക്കാരുമായി സംവദിക്കുന്നതിന്റെ ഇടയിലെ രസകരമായ സന്ദര്‍ഭം ശശി തരൂര്‍ തന്നെയാണ് ട്വിറ്ററിലൂടെ പങ്കുവെച്ചത്.
A 2-minute sidelight from my recent visit to Nagaland seems to be going around on @WhatsApp: here it is! https://t.co/1Eatgjv7W6
— Shashi Tharoor (@ShashiTharoor) March 6, 2023
‘സമീപകാലത്ത് ഞാന്‍ നാഗലാന്റില്‍ നടത്തിയ സന്ദര്‍ശനത്തിന്റെ വീഡിയോ വാട്‌സ്ആപ്പിലൂടെ പ്രചരിക്കുന്നുണ്ട്, അത് ഇവിടെ ചേര്‍ക്കുന്നു,’ എന്ന് പറഞ്ഞാണ് തരൂര്‍ വീഡിയോ പങ്ക് വെച്ചത്.
വീഡിയോയില്‍ ഒരു പെണ്‍കുട്ടി ശശി തരൂരിന്റെ ഭംഗിയെ കുറിച്ച് ചോദിക്കുന്നത് കാണാം.
എങ്ങനെയാണ് ഒരാള്‍ക്ക് അത്ഭുതമുണര്‍ത്തുന്ന വിധം സുന്ദരനും ഊര്‍ജസ്വലനും അതേസമയം ബുദ്ധിശാലിയും സമര്‍ത്ഥനുമാകാന്‍ സാധിക്കുന്നതെന്ന് പെണ്‍കുട്ടി ചോദിച്ചു.
ഇതിനുള്ള ശശി തരൂരിന്റെ മറുപടിയാണ് ഇപ്പോള്‍ പ്രചരിക്കുന്നത്.
‘ ഇതില്‍ നിങ്ങള്‍ക്ക് ചെയ്യാന്‍ പറ്റുന്ന കാര്യങ്ങളും ചെയ്യാന്‍ പറ്റാത്ത കാര്യങ്ങളുമുണ്ട്. നിങ്ങള്‍ നിങ്ങളുടെ രക്ഷിതാക്കളെ ബുദ്ധിപരമായി തെരഞ്ഞെടുക്കുക. ഇതൊക്കെ ജീനില്‍ ഉള്‍പ്പെടുന്നതാണ്. ഇതിനെല്ലാമുപരി നിങ്ങള്‍ എല്ലാവരും നന്നായി ജോലി ചെയ്യണം,’ തരൂര്‍ പറഞ്ഞു.
